بلوچستان لبریشن پرنٹ(بی ایل ایپ) ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ سی اگست ءَ بی ایل ایپ ءِ سرمچاراں مشکے ءِ ھند سنیڑی ءَ شپ ءِ ادار نھ ءُ نیم ءَ پاکستانی پوج ءِ بنجل ءُ کشندہ ٹولی ءِ بنجل ءِ سر ءَ یکیں وھد ءَ اُرش کرتگ۔ سرمچاراں گوں تُپنگ ءُ ٹوھیں سلاھاں بنجل نشانگ کرتگ اَنت۔ چہ ایشی آسر ءَ کشندہ ٹولی ءِ یک کارمندے مرتگ ءُ پوج ءِ بنجل ءِ دیوالاں تاوان بوتگ۔
آئی گوشتگ کہ ھمے روچ ءَ مستونگ ءَ کڈ کوچگ ءِ نزیک ءَ سرمچاراں مادن بروکیں گاڑیانی سر ءَ اُرش کرتگ۔ تیرگواری ءِ آسر ءَ کاروان ءَ ھواریں سَے گاڑیانی ٹائر تراکینتگ اَنت۔ ھمے روچ ءَ گرو ءَ مادن بروکیں یک دگہ گاڑی یے نشانگ کرتگ ءُ ٹائر تراکینتگ اَنت۔ ڈرئیوار مردم گری ءِ بنیاد ءَ یل داتگ۔
آئی گوشتگ کہ 31 اگست ءَ مشکے ءِ ھند اوگار ءَ نیمروچ ءِ ادار یک ءَ بی ایل ایپ ءِ سرمچاراں پاکستانی پوج ءِ یک گاڑی یے ءِ سر ءَ سنگر گپتگ ءُ اُرش کرتگ۔ گاڑی چہ بنجل ءَ درکپتگ کہ نشانگ کرتگ چہ ایشی آسر ءَ چار کارمند جاھی مرتگ۔ اُرش ءَ پد آدگہ جھلی ءُ برزی پوج ءِ ٹولی پہ لشکر کشی ءَ جنگجاہ ءِ نیمگ ءَ آتکگ اَنت بلے سرمچار گوں شوربندی ءِ رد ءَ چہ دمگ ءَ درکپگ ءَ سوبین بوتگ اَنت۔
میجر گھرام ءَ مشکے ءُ مستونگ ءَ پنچ کاروائیانی زمہ واری من اِتگ ءُ گوشتگ کہ داں بلوچستان ءِ آجوئی ءَ زورگریں پوج ءُ آئی کمکار سلاہ بندیں ٹولیانی ءُ لٹ ءُ پلی شرکت نشانگ کنگ بنت۔
میجر گھرام ءَ درشان ءِ گڈی ءَ گوشتگ کہ اے کاروائیانی تامر ھم جوڑ کرتگ کہ آ زوت چہ گل ءِ میڈیا بھرگ آشوب ءَ شنگ کنگ بیت۔
