لندن: برتانیا ءِ بنجاھی شھر لندن ءَ زوربیگواھی ءِ میان استمانی روچ ءِ درگت ءَ جیئے سند فریڈم موومنٹ ءِ سرکماش سھیل ابڑو ءِ سروکے ءَ 10 ڈاؤننگ اسٹریٹ ءَ برتانیا ءِ مزن وزیر ءِ گس ءِ دیم ءَ زهرشانی کنگ بیتگ۔
زھرشانی ءَ جموں کشمیر نیشنل ایکولیٹی پارٹی ، جیئے سند فریڈم موومنٹ ، بلوچ نیشنل موومنٹ ، بلوچ ریپبلکن پارٹی ، وائیس پار مسنگ پرسنز آپ سند ءُ پشتون تھپز موومنٹ ءِ سروک ءُ کارکناں بھر زرتگ ، ھمے وڑ ءَ بلوچستان ءِ ھان آپ کلات ءَ ھم اے زھرشانی ءَ بھر زرتگ ءُ وتی ھمدردی درشان کرتگ۔
چه زھرشانی ءَ پیش درسیں گلانی سروکاں مزن وزیر ءِ کارگس ءَ یاداشتے ٹھینتگ ءُ آئی ءِ رد ءَ گوشتگ که چه پاکستان ءِ نیمگ ءَ بلوچستان ، سند ، ھیبرپکتونکواه ، گلگت بلتستان ءُ کشمیر ءَ انسانی ھکانی بگیری گنتریں وڑے ءَ برجاه اِنت ، یاداشت ءِ ته ءَ چه برتانیا ءِ سرکار ءَ لوٹ کنگ بیتگ که پاکستان ءِ زوراکیانی بگیری ءَ گامگیج بزور ایت دانکه زوربیگواھی ءُ ریاستی زوراکی ھلاس به بنت اے درسیں راج وتی بنکی سیاسی ءُ انسانی ھکاں سر به بنت۔
زھرشانی ءَ بلوچ نیشنل موومنٹ ( بی این ایم ) ءِ باسک جاسم بلوچ ءَ تران کرتگ ءُ گوشتگ که بلوچستان ءَ هزارانی کچ ءَ مرد ، جنین ءُنودربر زوربیگواہ کنگ اَنت که چه آیاں بازیں مردم ءِ ژانگولیں لاش چگل دیگ بوتگ ، ھمے میان ءَ ڈاکٹر ماه رنگ بلوچ ءُ آئی ھمراه بیبو بلوچ ، شاه جی ءُ گلزادی ھم بندیگ کنگ بیتگ اَنت ، ھمے وڑ ءَ استاد واھد کمبر ءَ هم دو سال ءَ گیش اِنت که بندیگ اِنت ءُ آئی ءِ کھول ءَ آئی ءِ زند ءِ بابت ءَ ھچ وڑیں ھال دیگ نه بیتگ۔
جاسم بلوچ ءَ گوں میان استمان ءَ بلوچ چکچینی ءُ زوربیگواھیانی بند کنگ ، بلوچ سیاسی کارکنانی ایمنی ءُ پھازگ ءُ درسیں راجانی په اھوکیں وھد ءَ پیسله کنگ ءِ لوٹ کرتگ۔
