نیشنل دیموکریٹک پارٹی ( این ڈی پی ) ءِ بنجاھی سروک شاہ زیب ایڈوکیٹ ءَ شال پریس کانپرس کرتگ ءُ گوشتگ که چه ریاست ءِ ترندیں درشان ءَ پد بلوچستان ءِ جاور گیشتر ناگیگ بیتگ اَنت ، سیاسی ءُ جمھوری راھانی سر ءَ بندش جنگ درکانودی ءُ انساپ ءِ گُٹگیر کنگ ءِ نشان اِنت۔
آئی ءَ گوشتگ که این ڈی پی ءِ بنجاھی باسک گنی بلوچ 25 مئی ءِ شپ ءَ وھدے که چه شال ءَ کراچی ءَ روگ ءَ بیتگ ھزدار ءَ ایپ سی ءُ چیریں ادارھانی کارمنداں چه بس ءَ ایر گیپتگ ءُ بیگواه کرتگ که انگت ءَ بیگواه اِنت ، ھمے وڑ ءَ گل ءِ دومی بنجاھی باسک سنا کھیتران بلوچ 10 اگست ءَ ایپ آئی اے ءِ سروکاں چه ملتان بالی پٹ ءَ دزگیر ءُ بیگواه کرتگ ، چه ایشی ءَ ابید گل ءِ بارکان ھنکین ءِ باسک گل میر بلوچ ءُ سلال بلوچ 30 ءُ 31 جولائی 2025 ءِ میان ءِ شپ ءَ ریاستی کارمنداں چه بارکان ءَ آوار جتگ ءُ بیگواه کرتگ اَنت ، ھمے وڑ ءَ کراچی ءِ جاه منندیں دو باسک زکریا بلوچ 24 مئی ءَ چه هزاره گوٹ ءُ زاھد بلوچ 17 جولائی ءَ چه لیاری ءَ سادگ پوشاکیں کارمنداں زوربیگواه کرتگ اَنت۔
جارکش ءَ گوشتگ که این ڈی پی یک سیاسی ءُ جمھوری گل ے ءُ آئی ءِ مول تھنا بلوچ سرڈگار ءِ وشھالی ءُ اکوام متھده ءِ انسانی ھکانی رھبندانی رد ءَ میان استمان ءَ زوراکیانی آماچیں راجانی ھمرائی ءُ جمھوری جھد ءِ گیش کنگ اِنت. این ڈی پی بلوچ راجی جیڑھ ءِ بابت ءَ وتی کانودی ھک ءَ لوٹگ اِنت ءُ بلوچ راج ءِ وتواکی ءِ ھک ءَ میان استمانی رھبندانی سر ءَ اوشتوک اِنت ، بلوچستان ءِ رودراتکی بھر ھم پاکستان ءِ جوڑ کرتگیں رھبندانی سر ءَ اِنت ، اود ءَ بلوچ سیاسی کارکناں کانود ءِ رد ءَ یک شھری یے ءِ ھک ھست۔
جارکش ءَ گوشتگ که اے پریس کانپرس ءِ بنکی مول ریاست ءِ کڈن کنگ اِنت که این ڈی پی ءِ کارکناں ھوار درسیں بلوچ ءُ آدگه زوربیگواھیں مردمانی آجو کنگ ءِ سر ءَ کار به کنت اگاں یک سیاسی کارکنے ءِ سر ءَ بھتام ھست گڑا آئی ءَ آمیدگس ءَ پیش به کنت ءُ آئی ءِ بابت ءَ کانودی کاروائی به کنت چے ءَ که زوربیگواه کنگ یک سرجمیں چاگردے ءِ سزا دیگ ءُ نسلی ءُ چاگردی تباھی اِنت که اے سکا ترسناک ءُ نوک آبادیاتی رویشتانی درچ اِنت۔
