بلوچ وومن پورم ءِ بنجاھی سروک ڈاکٹر شلی بلوچ ءَ وتی شنگ کرتگیں درشانے ءَ گوشتگ کہ نزر مری شال ءَ پہ نزوریں بلوچ مھلوک ءَ مھکمیں توارے ءُ آ یک انچیں چاگردے ءِ لوٹوک اِنت کہ انسانی ھک لگتمال کنگ مہ بنت، آ 27 اگست ءِ شپ ءَ چہ شال ءِ شھر گولیمار ءَ چاراہ ءَ بیگواہ کنگ بیتگ۔ نزر مری بلوچ یکجھتی کمیٹی ءِ باسک اِنت کہ آئی بنجاھی سروک پیسر ءَ درکانودی بندیگ اَنت۔
آئی ءَ گوشتگ کہ بلوچستان ءَ پر ایمنیں سیاسی جھد ءِ سر ءَ پابندی اِنت۔ اد ءَ مردم پہ بنیادی ھکاں توار چست کنگ ءِ پژدر ءَ زوراکیانی آماچ کنگ بنت ءُ درکانودی بندیگ کنگ بنت۔ اے ھما ھک اَنت کہ ایشی ریاست ءِ وتی آئین ءَ نبشتہ اَنت، بلے بلوچ بوگ ءِ بنیاد ءَ ما چہ ھمیشاں زبھر کنگ بیتگ ایں۔ نزر مری ءُ آدگہ سیاسی کارکن ھمے راستی ءِ پژدر ءَ سزا دیگ بوگ ءَ اَنت۔
ڈاکٹر شلی بلوچ ءَ گوشتگ کہ ما تچک ءَ گوش ایں کہ سیاسی جھد کنگ مئے بنیادی ھک اِنت۔ ریاست ھچ پیم ءَ اے ھک ءَ اچما پل اِت نہ کنت ءُ نہ چہ درکانودی گامگیج ءَ انچوش کہ زوریں بیگواھی ءُ درکانودی دزگیری اَنت چہ ایشی ءَ مارا بے توار کرت کنت۔ اے وھد ءِ لوٹ اِنت کہ ریاست ءَ پر ایمنیں سیاست ءِ در ءِ بند کنگ ءِ جاہ ءَ وتی واکداری گھتر کنگی اِنت ءُ نزوریں راجانی گون ءَ وتی رویشتاں شر بہ کنت۔
آئی ءَ گوشتگ کہ ما نزر مری، گنی بلوچ، سناکھیتران بلوچ ءُ آدگہ درسیں بیگواہ ءُ درکانودی بندیگیں بلوچ سیاسی کارکن ءُ لس شھریانی زوتیں آجوئی ءِ لوٹ ءَ کن ایں۔ گوں ایشی ھوار ریاست ءُ آئی ادارھاں لوٹ کن ایں کہ آ بلوچ سیاسی کارکنانی گون ءَ زوراکی ءَ زوت بند بہ کنت۔
