کراچی: پہ زور بیگواھیں مردمانی پد جنگ ءَ کراچی پریس کلب ءِ دیمءَ برجاھیں زھرشانی نندانکءَ بیست ءُ پنچ روچ سرجم بیتگ کہ انگت برجاہ اِنت۔
اے وھد ءَ زور بیگواھیں زاھد بلوچ ، سرپراز بلوچ، شیراز ءُ سیلان بلوچ ءِ کھول پہ وتی آزیزانی آجوئی ءَ زھرشانی نندانک ءَ ساڑی اَنت۔سیاسیءُ انسانی ھکانی کارکناں ھوار جتائیں بھرگاں سیادی داروکیں مردم پہ ھمدردری درشان کنگ ءَ زھرشانی نندانکءَ پیداک اَنت۔
مرچی زھرشانی نندانک ءَ زور بیگواھیں سرپراز بلوچ ءِ مات بی بی گلشن بلوچ نادراہ بیتگ بلے انگت ءَ آ زھرشانی نندانک ءَ ساڑی بیتگ۔
زھرشانی ءَ نشتگیں مردمانی گوشگ اِنت کہ مئے زھرشانیءَ بیست روچ ءَ گیش اِنت بلے چہ سرکار ءِ نیمگ ءَ پہ مئے لوٹانی گوش دارگ ءَ ھچ وڑیں گامگیج زورگ بوگ ءَ نہ اِنت۔ دانکہ مئے بیگواھیں آزیز آجو نہ بیتگ اَنت ما وتی زھرشانی ءَ برجاہ دار ایں۔
آیانی گوشگ اِنت اگاں مئے زھگانی سر ءَ چونیں ھم بھتامے ھست گڑا آمیدگس ءَ پیش کنگ بہ بنت۔ زوریں بیگواھی انسانی ھکاں ھوار ڈیھ ءِ کانودءُ آئین ءِ بگیری اِنت۔
