آواران ءِ ھند مشکے ءَ پاکستانی پوج ءَ جتائیں وھداں دو براتاں ھوار سے مردم آوار جتگ ءُ بیگواہ کرتگ۔
زرمبش جھگیر ءِ رد ءَ بیگواھیں ورنایانی نام مکتیار اھمد ء اشرپ بلوچ، سابر بلوچ ء اشرپ ءُ جلیل بلوچ ء مراد اِنت۔
سابر ءُ مکتیار دوئیں وت ماں وت برات اَنت ءُ مشکے ءِ میتگ کُچ ءِ جاہ منند اَنت۔ پاکستانی پوج ءَ پیری کُچ ءَ بیڑ برتگ ءُ دوئیں برات آوار جتگ اَنت۔
بیگواھیں سابر ءِ بابت ءَ گوشگ بیت کہ لیویز کارمندے اِنت۔ مکتیار اھمد پیسر ءَ ھم یکبرے پاکستانی پوج ءَ برتگ ءُ بیگواہ کرتگ داں لھتیں روچاں آزار دیگ ءَ پد یل کنگ بیتگ۔
جلیل بلوچ مشکے ءِ میتگ کالار ءِ جاہ منند اِنت کہ مرچی سھب ءَ چہ مشکے ءِ بازار ءَ آوار جنگ ءُ بیگواہ کنگ بیتگ۔
چوش کہ پاکستانی پوج ءَ ھمے سال ءَ مشکے ءَ یکیں کھول ءِ ھشت ورنایاں ھوار بیست ءَ گیش بیگواھیں مردم کشتگ ءُ آیانی لاش چگل داتگ اَنت۔
بیگواھیں مکتیار اھمد، سابر بلوچ ءُ جلیل بلوچ ءِ کھول پہ وتی آزیزانی بیگواھی ءَ سکا ترس آماچ اَنت۔
