بلوچ ریپبلکن پارٹی ءِ سروک براھمدگ بگٹی ءَ نواب اکبر بگٹی ءِ شھیدی ءِ نوزدھمی سالروچ ءِ درگت ءَ وتی شنگ کرتگیں درشانے ءَ گوشتگ که نوزده سال پیش دژمن ءَ شھید نواب اکبر ھان بگٹی ءِ بے توارکنگ ءِ جھد کرتگ اَت بلے آ بے سوب بوت ، آئی ءِ دیمونی ءَ انچیں راھے جوڑ کرت که مروچی ما ھمے راه ءَ جنزان اِیں ، آئی ءِ اَرواه جھد ءِ میان ءَ ساہ کشگ ءَ اِنت ءُ آئی ءِ واھشت ھمک بلوچ ءِ دل ءَ زندگ اِنت۔
آئی ءَ گوشتگ که شھید نواب اکبر ھان بگٹی ءَ دژمن ءِ دیم ءَ سر جھلی ءِ جاه ءَ په وتی راج ءُ سرڈگار ءَ ندر بوگ گچین کرتگ ، آئی ءِ گھگیری مروچی ھم مئے راهانی چراگ اِنت۔
براھمدگ بگٹی ءَ وتی درشان ءِ گڈی ءَ گوشتگ که ما شھید نواب اکبر ھان بگٹی ءِ شرپمندیں بلوچ راجدوستی ءِ واھگ زرتگ ءُ ما گوں توکل ءَ دیم ءَ جنزگ ءَ ایں۔
