کراچی: ریاستی ادارھانی دست ءَ زوریں بیگواھیانی بگیری ءَ کراچی پریس کلب ءِ دیم ءَ برجاھیں زھرشانی نندانک ءَ بیست ءُ یک روچ سرجم بیتگ کہ انگت برجاہ اِنت۔ اے وھد ءَ زور بیگواھیں زاھد الی بلوچ ءُ سرپراز بلوچ ءِ کھول زھرشانی نندانک ءَ نشتگ اَنت۔
زھرشانی نندانک ءَ سیاسی ءُ انسانی ھکانی کارکناں ابید جتائیں بھرگاں سیادی داروکیں مردم پہ کھولانی ھمدردی درشان کنگ ءَ پیداک اَنت۔
چہ زھرشانی جان ءَ سرپراز بلوچ ءِ مات بی بی گلشن بلوچ ءِ گوشگ اِنت کہ منی زھگ 26 پروری 2025 ءَ برانی نادراھجاہ ءِ دیم ءَ سادگ پوشاکیں کارمنداں ھما وھد ءَ آوار جتگ کہ آئی پہ وتی نادرائیں ناکو ءَ نان آرتگ ءُ واتر روگ ءَ بیتگ۔
آئی ءِ گوشگ اِنت کہ چنچو ماہ ءِ گوزگ ءَ ابید سرپراز بلوچ ءِ ھچ وڑیں ھال نیست کہ چون ءُ کج ءَ اِنت۔ اگاں مئے زھگ ءِ سر ءَ چونیں بھتامے ھست گڑا آمیدگس ءَ پیش کنگ بہ بیت۔
زور بیگواھیں زاھد الی بلوچ ءِ پت ابدلھمید بلوچ ءِ گوشگ اِنت کہ منی زھگ 17 جولائی 2025 ءَ چہ کراچی ءِ ھند گولیمار ءَ ریاستی ادارھانی کارمنداں آوار جتگ ءُ بیگواہ کرتگ۔
زھرشانی کنوکیں مردمانی گوشگ اِنت دانکہ مئے مردم آجو نہ بنت ما وتی زھرشانی ءَ برجاہ دار ایں۔
