
گوادر/تربت/کراچی : زی پاکستانی پوج ءَ جتائیں جاھاں بیڑ برتگ ءُ شش مردم آوار جنگ ءَ پد بیگواہ کرتگ۔
اھوالکار ءِ رد ءَ پاکستانی پوج ءَ زی بیگاہ ءَ گوادر ءِ ھند کلدان ءَ بیڑ برتگ وسیم بلوچ ء لال جان، وھید بلوچ ء مراد ءَ ھوار دگہ یک ورنایے آوار جتگ ءُ بیگواہ کرتگ۔
ھمے وڑ ءَ زی چہ تربت ءَ پاکستانی پوج ءَ اسمان مکبول نامیں ورنایے آوار جتگ ءُ بیگواہ کرتگ۔ اسمان مکبول چہ ایشی پیش ھم یکبرے بیگواہ کنگ بیتگ ءُ اے آئی دومی رند اِنت کہ آوار جنگ بیتگ۔
اسمان مکبول ءِ بیگواھی ءِ گپ وی بی ایم پی ءَ راست کرتگ ءُ گوشتگ کہ اسمان مکبول اولی رند ءَ 2019 ءَ چہ پیدراک ءَ بیگواہ کنگ بیتگ ءُ پد ءَ 2021 ءَ آجو بیتگ اے آئی دومی رند اِنت کہ بیگواہ اِنت۔
آئی ءَ چہ سرکار ءَ پہ اسمان مکبول ءِ آجوئی ءَ دلجمی دیگ ءِ لوٹ کرتگ۔
زرمبش جھگیر ءِ رد ءَ ریاستی ادارھاں دوشی سے ءَ ملیر ءَ بیڑ برتگ ءُ دو مردم داد کریم ء مولا بکش دیدگ ءُ شئیب اھمد ء واھد بکش آوار جتگ ءُ بیگواہ کرتگ اَنت۔ دوئیں مردم کیچ ءِ ھند گیبن ءِ جاہ منند اَنت۔