کراچی: سی ٹی ڈی ءِ دست ءَ بیگواہ کرتگیں سادک بلوچ ءِ کھول ءَ کراچی پریس کلب ءَ پریس کانپرنس کرتگ ءُ گوشتگ کہ مرچی سھب ءِ ادار پنچ ءُ نیم ءَ سی ٹی ڈی، پولیس ءُ چیریں ادارھانی کارمنداں مئے گس ءَ بیڑ برتگ ءُ گسانی دروازگ پروشتگ اَنت کماش ءُ زھگانی گون ءَ زوراکی کرتگ ءُ مئے زھگ سادک بلوچ گوں وت برتگ۔ ما چہ وتی زھگ ءِ بیگواھی ءَ سکا جنجال ایں ۔
سادک بلوچ ءِ کھول ءِ گوشگ اِنت کہ ما کراچی ءِ جاہ منند ایں مرچی پہ انساپ ءِ لوٹ ءَ شمئے دیم ءَ آتکگ ایں ، اے پہ ما سکا بژنی گپے کہ ما یک انچیں ڈیھے ءَ زند گوازینگ ءَ ایں کہ آ جمھوری گوشگ بیت، بلے اود ءَ سرکار، آمیدگس ءُ رسانکدر وتی کرداں پیلو کنگ ءَ نہ اَنت۔
آیاں گوشتگ کہ ما وتی لاچاری ءُ بزگی ءِ ھال ءَ چہ شمے رسانکدر ءِ رد ءَ داں واکداراں سر کنگ ءُ وتی زھگ ءِسلامتی ءُ آجوئی ءَ لوٹءَ کن ایں ۔ پہ سرکار ءَ بلکیں آ یک شکی ئیں مردمے بیت بلے مئے گس ءِ چراگ اِنت۔ ما چہ وتی زھگ ءَ دلجم ایں کہ آ بے میار اِنت۔ ما گوں سرکار ءَ دزبندی کن ایں کہ آ مئے زھگ ءَ زوت آجو بہ کنت۔
سادک ءِ کھول ءَ گوں انسانی ھکانی کارکناں ھوار درسیں مھلوک ءَ لوٹ کرتگ کہ آ پہ مئے انساپ دیگ ءَ توار چست بہ کن اَنت۔
