آواران: کولواہ ءِ میتگ مالار ءَ پاکستانی پوج ءَ بیڑ برتگ ءُ زور بیگواھیں سول جان ءِ برات کچکول بلوچ آوار جتگ ءُ بیگواہ کرتگ۔
زرمبش جھگیر ءِ رد ءَ کچکول بلوچ ء میار ءَ 20 اگست ءِ بانگواہ ءِ پنچ ءَ چہ مالار مچی ءَ پاکستانی پوج ءَ گوں دگہ باز مردمانی ھواری ءَ آوار جتگ ءُ برتگ، آدگہ مردم ھما روچ ءَ یل کنگ بیتگ اَنت کچکول بلوچ انگت ءَ بیگواہ اِنت۔
کچکول ءِ برات سول جان ء میار ءَ پاکستانی پوج ءَ 18 جولائی 2015 ءَ چہ وھلی ءَ آوار جتگ ءُ بیگواہ کرتگ کہ انگت ءَ بیگواہ اِنت۔
بیگواھیں کچکول ءِ بابت ءَ گوشگ بیت کہ 26 مئی 2025 ءَ مالار مچی ءَ پاکستانی پوج ءَ گسے ءَ بیڑ برتگ اَت نئیم بلوچ ءُ ھوری بلوچ کشتگ اَت ءُ دادی بلوچ نامیں جنینے ٹپی کرتگ اَت ھما کھول ءِ مردم اِنت۔
کچکول بلوچ ءِ کھول ءَ چہ انسانی ھکانی ادارھاں پہ آئی آجوئی ءَ توار چست کنگ ءِ لوٹ کرتگ۔
