اسلام آباد ءَ پہ بلوچ یکجھتی کمیٹی ءِ سروک ءُ زور بیگواھیں مردمانی کھولانی زھرشانی ءَ سی ءُ ھشت روچ سرجم بیتگ کہ انگت ءَ برجاہ اِنت۔ پہ کھولانی ھمدردی درشان کنگ ءَ جتا جتائیں بھرگاں سیادی داروکیں مردم پیداک اَنت۔
زھرشانی کنوکیں مردمانی گوشگ اِنت کہ چہ ترندیں گرم ءُ سرکار ءِ زوراکیاں ابید ما وتی زھرشانی برجاہ داشتگ کہ مئے زھرشانی ءَ کسانیں زھگ ءُ پیرزال ھم ھواراَنت۔ مئے زھرشانی ءَ ماھے سرجم بیتگ بلے چہ مئے لوٹانی منّگ ءَ ابید مارا نندگ ءِ آسراتی ھم دیگ بوگ ءَ نہ اِنت۔
آیانی گوشگ اِنت کہ اے زھرشانی تھنا پہ مئے آزیزانی آجوئی ءَ برجاہ نہ اِنت بلکیں بلوچستان ءِ درسیں بیگواھیں مردمانی کھولانی جھگیری ءَ کنت۔
آیانی گوشگ اِنت دانکہ بلوچ یکجھتی کمیٹی ءِ سروک ءُ زور بیگواھیں مردم یل کنگ مہ بنت مئے زھرشانی برجاہ بیت۔
چوش کہ چہ سرکار ءِ نیمگ ءَ پہ آیانی لوٹانی منّگ ءَ ھچ وڑیں دلجمیں گامگیج زورگ نہ بیتگ۔
