بلوچ نیشنل موومنٹ ( بی این ایم ) ءَ امریکی ایکسم بینک ءِ نیمگ ءَ زورگپتیں بلوچستان ءَ پہ ریکوڈک شوربندی ءِ مالی کمک ءِ سر بژن درشان کرتگ ءُ گوشتگ کہ امریکن بینک ایکسم ءُ امریکی سرکار ءِ نیمگ ءَ پاکستان ءِ گون ءَ انوگیں شریداری جار میان استمانی راھبند ءُ انسانی زرد ءِ دوئینانی بگیری اِنت۔ ما مدام ھمے گوشتگ کہ پاکستان ءِ گون ءَ بیوکیں ھرپیمیں مالی شریداری ءِ آسر ءَ بلوچ راج ءِ چکچینی گیش بیت ءُ زوریں بیگواھی ءُ مڈیانی لٹ ءُ پل ءِ دروشم ءَ دیم ءَ کیت۔
آئی ءَ گوشتگ کہ امریکہ ءِ نیمگ ءَ پہ پاکستان ءَ 1.25 ملین ارب ڈالر ءِ نوکیں مالی پیکج بلوچستان ءِ وتگڑیں دیمروئی شوربندی ءَ دراجکش کنت ءُ ایشی آسر ءَ پوجی کاروائی گیش کنگ بنت۔ آبادی پہ زور کشگ بنت ءُ بلوچ ءِ مڈیانی لٹ ءُ پل گیش بیت۔
جارکش ءَ گوشتگ کہ امریکہ ءَ وت نوک آبادکاری ءِ بگیری ءَ آجوئی ءِ جنگ کرتگ ءُ پہ آجوئی زرمبشتانی ھلاسی ءِ گوستانکی مول ءَ ھم سرپد اِنت بلے چہ ایشی ءَ ابید مرچی پاکستان ءِ گون ءَ یک انچیں شریداری یے کنگ ءَ اِنت کہ اے بلوچ راجی زرمبشت ءِ نزور کنگ ءُ ریاستی زوراکیانی کمک کنگ زانگ بیت۔ چہ نزوری ءَ ابید جھان ءِ چونیں ھم راجی زرمبشتے ءَ ڈنی ارشکارانی بگیری ءَ مڑ اتگ ءُ دانکہ وتی گوستانکی ءُ راجی مول ءَ سوبین بوتگ اَنت۔
آئی ءَ گوشتگ کہ بلوچستان ءَ باپاری ءِ ٹاپار جنوکاں پیسر ءَ امریکہ ءِ وتی راجی زرد ءُ واک ءِ دیم ءَ اے جست الّم کنگ لوٹ ایت کہ ھزارانی کچ ءَ بلوچ ورنا پاکستان ءِ چیریں زنداناں در انسانی آزار سگگ ءَ اَنت ءُ ھزارانی کچ ءَ مات ءُ گھار دگانی سر ءَ وتی آزیزانی راھاں چارگ ءَ اَنت۔ اے وڑ ءَ امریکی کمک بلوچ راج ءِ ٹپانی درمان نہ اِنت واد پریچگ اِنت۔ ما ھمے اوست ءَ دار ایں کہ امریکہ ءِ زرد اے زوراکی ءِ دیم ءَ گھگیری کنت نیکہ اے باپاری ءِ نام ءَ دراجکش کنت۔
