بلوچ یکجھتی کمیٹی (بی وائی سی) ءَ وتی شنگ کرتگیں درشانے ءَ گوشتگ کہ بی وائی سی ءِ سروک ڈاکٹر ماہ رنگ بلوچ، بنجاھی پتر ءِ باسک بیبگر بلوچ، شاہ جی سبگت اللہ ءَ ھوار گلزادی بلوچ، بیبو بلوچ، ماما گپار ءُ امران بلوچ ءِ درکانودی دزگیری ءَ پنچ ماہ گوستگ۔ بی وائی سی ءِ سروکانی دزگیری نہ تھنا ھمے سیاسی سروک یا گل ءِ بگیری ءَ ریاستی زوراکی یے، بلکیں اے بلوچ راج ءِ مچی ھستمان ءُ آیانی راجی جھد ءِ ھلاس کنگ ءِ ریاست ءِ دیریگیں لوٹ ءُ واھشت ءِ بھر اِنت۔
آئی گوشتگ کہ پاکستان ریاست بلوچستان ءَ چہ کرناں گوں ھندی مردماں زوراکی کنگ ءَ اِنت۔ زوریں بیگواھی، درکانودی کوش، لاشانی چگل دیگ ءُ جنین ءُ زھگانی نشانگ کنگ دودے جوڑ بیتگ۔ ڈاکٹر ماہ رنگ بلوچ ءُ بی وائی سی ءِ سروک ھمے زوراکی ءِ بگیری ءَ توار چست کنگ ءَ بوتگ ءُ پہ ھمے توار ءِ دارگءَ آ دزگیر کنگ بوتگ اَنت۔ اے دزگیری ھمے گپ ءِ منانک اِنت کہ پاکستان ریاست چہ بلوچ مھلوک ءِ جمھوری ءُ پُرایمنیں جھد ءَ ترس آماچ اِنت۔
آئی گوشتگ کہ پنچ ماہ ءِ گوزگ ءَ ابید مئے سروکانی بگیری ءَ نہ گواہ پیش کنگ بوتگ ءُ نہ ریاست ءِ بھتام راست بوتگ اَنت۔ چہ ایشی ءَ ابید مئے سروک نہ یل کنگ بوگ ءَ اَنت ءُ نہ شریں وڑے ءَ آیانی کیس دیم ءَ برگ بوگ ءَ اِنت۔ آمیدگس ءَ تھنا ریاستی چیریں ادارہ ءِ گپانی سر ءَ کار کرتگ۔ اے رنگ ءَ آمیدگس انساپ ءِ پھازدار نہ اِنت بلکیں ریاست ءِ زوراکی ءِ بھر اِنت۔
آئی گوشتگ کہ ڈاکٹر ماہ رنگ بلوچ ءُ آئی ھمراہ اے زندان ءَ ھم گھگیری ءِ چیدگ اَنت۔ آیانی دزگیری ءَ بلوچ مھلوک ءِ توکل نزور نہ کرتگ بلکیں گیش مھکم کرتگ۔ بی وائی سی کریک ڈاؤن ءُ زوراکیاں ابید بلوچستان ءَ ریاست ءِ زوراکی ءُ بلوچ چکچینی ءِ بگیری ءَ یکشل ءَ جھد کنگ ءَ اِنت ءُ بلوچ مھلوک ءَ اے زوراکی ءِ بگیری ءَ یکجاہ کنگ ءَ اَنت۔
آئی گوشتگ کہ ما گوں جھانی انسانی ھکانی گلاں لوٹ کن ایں کہ آ پاکستان ءِ زوراکیانی سر ءَ بے توار مہ بنت۔ ڈاکٹر ماہ رنگ ءُ بی وائی سی ءِ کارکنانی دزگیری نہ تھنا بلوچستان ءِ جیڑہ اِنت بلکیں جھانی انسانی ھکانی ءُ پہ انساپ ءَ جھد ءِ جیڑہ اِنت۔ اگاں جھان اے زوراکی ءِ سرءَ بے توار بیت گڑا اے زوراکی انگت گیش بوان کنت۔
