بلوچ اسٹوڈنٹس آرگنائزیشن آزاد ( بی ایس او آزاد ) ءِ جارکش ءَ وتی شنگ کرتگیں درشانے ءَ گوشتگ کہ زورگریں پاکستان ریاست ءِ اے آدت اِنت کہ بلوچستان ءَ وانندگیں مردماں گوں جتائیں دروشماں نشانگ کنگ ءَ اِنت۔ پروپیسر اسمان کازی ءِ آوار جنگ ءُ آئی زوریں گپ گرگ ءُ آئی ءَ گوں بلوچ سلاہ بندیں گلانی کاراں ھوار کنگ پاکستانی پوج ءِ ھما پالیسیانی بھر اِنت کہ آئی مول بلوچ مھلوک ءِ جتائیں بھرگانی نشانگ کنگ اِنت۔
آئی ءَ گوشتگ کہ پروپیسر اسمان کازی بنداتی مردم نہ اِنت کہ آئی ءَ پاکستانی پوج ءِ کارمنداں بلوچ راج ءِ زانشت دیگ ءِ بنیاد ءَ تاوان داتگ بلکیں چہ ایشی ءَ پیش سبا دشتیاری گون وتی باڑھی کارمندانی رد ءَ شھید کرتگ، شھید پروپیسر رازک، ماسٹر ھیبت اللہ ءَ ھوار بازیں وانندگ بلوچ پروپیسر ءُ استاد پوج ءَ نشانگ کرتگ ءُ شھید کرتگ اَنت۔
آئی ءَ گوشتگ کہ بلوچ راج وتی آجوئی ءِ جنگ ءَ مڑگ ءَ اِنت اے گپ ءَ ھچ شک نیست کہ بلوچستان ءِ ھمک زھگ ءُ کماش درس چہ زورگریں پاکستان ریاست ءَ آجوئی ءَ لوٹگ ءَ اَنت۔ پاکستان یک زورگپتیں ریاستے ءُ آئی بلوچ راج ءِ سر ءَ پہ زور وتی زورگپتی برجاہ داشتگ۔ پاکستان ریاست پہ بلوچانی توار ءِ دارگ ءَ وتی زوراکی ءِ ھمک ھیلہ ءَ کار گرگ ءَ اِنت۔ آ چہ بلوچ راجی زرمبشت ءَ ھما کچ ءَ ترس آماچ اِنت کہ ھمک شھری ءِ نشانگ کنگ، زوریں بیگواھی، کشت ءُ کوش ءُ انسانی ھکانی تچک ءَ لگتمالی دودے جوڑ بیتگ۔ بژن ءِ گپ ایش اِنت کہ جھان بزاں روکپتی توانمند چہ اے راستیاں سرپد بوگ ءَ ابید بے توار اَنت۔
آئی ءَ گوشتگ کہ پروپیسر اسمان کازی ءِ کیس جتا نہ اِنت بلکیں پاکستانی پوج ءِ ھمے ھیلھانی بھر اِنت۔ آئی مول بلوچ راج ءِ باسما ءُ لیکھی وانندگیں مردمانی نشانگ کنگ اِنت دانکہ بلوچ راج چہ زانشت ءِ ھساب ءَ پشت ءَ بہ بیت۔
