اسلام آباد ءَ چہ برجاھیں زھرشانی ءَ زوربیگواھیں شبیر بلوچ ءِ گھار سیما بلوچ ءَ وتی شنگ کرتگیں تامربندے ءَ گوشتگ کہ مئے زھرشانی ءَ اھے سرجم بیتگ۔ مئے لوٹ ھمیش اِنت کہ سرکار مئے بیگواھیں مردماں دیم ءَ بیار ایت ءُ بی وائی سی ءِ دزگیر کرتگیں سروک ءُ کارکناں زوت یل بہ کنت بلے چہ سرکار ءِ نیمگ ءَ مئے لوٹ گوش دارگ ءُ منگ نہ بیتگ اَنت۔
آئی گوشتگ کہ مئے لوٹانی منّگ ءِ جاہ ءَ ھمک روچ مارا ترسینگ ءُ بیھار دیگ ءَ اَنت کہ شما چہ اد ءَ پاد بیا اِت ءُ برو اِت۔ بلے دانکہ مئے لوٹ منّگ نہ بنت ما پاد نیا ایں۔
سیما بلوچ ءَ گوشتگ انچوش کہ مرچی چاردہ اگست ءِ روچ اِنت مردماں پاکستان ءِ بیرک گون اِنت ءُ دگانی سر ءَ شاتکامی کنگ ءَ اَنت۔ بلے مئے دست ءَ تھنا وتی بیگواھیں آزیزانی اکس انت ۔
آئی گوشتگ کہ مئے شاتکامی ءِ روچ ھما بیت کہ مئے بیگواھیں مردم دیم ءَ آرگ ءُ آجو کنگ بہ بنت۔
سیما بلوچ ءَ گوں سرکار ءَ لوٹ کرتگ ءُ گوشتگ کہ سرکار مئے مردماں آمیدگس ءَ پیش بہ کنت ءُ زندان ءَ بندیگیں بی وائی سی ءِ سروک ءُ کارکناں زوت یل بہ کنت۔
