چہ کراچی ءَ چیریں ادارھانی دست ءَ زور بیگواہ کنگ بیتگیں ورنا زاھد بلوچ ءِ کھول ءِ زھرشانی ءَ دہ روچ سرجم بیتگ کہ کراچی پریس کلب ءِ دیم ءَ برجاہ اِنت۔ جتائیں بھرگاں سیادی داروکیں مردم پہ آئی کھول ءِ ھمدردی درشان کنگ ءَ گدان ءَ پیداک اَنت۔
اے بابت ءَ زور بیگواھیں زاھد بلوچ ءِ کھول ءِ گوشگ اِنت مئے زھگ ءِ زوریں بیگواھی ءَ بیست ءُ نُھ روچ سرجم بیتگ بلے انگت ءَ آئی ھچ وڑیں ھال نیست کہ چون ءُ کج ءَ اِنت۔ مئے زھرشانی ءَ ھم دہ روچ سرجم اِنت بلے چہ سرکار ءِ نیمگ ءَ پہ لوٹانی منّگ ءَ ھچ وڑیں گامگیج زورگ نہ بیتگ۔
این ڈی پی ءَ زور بیگواھیں زاھد بلوچ ءِ کھول ءِ زھرشانی ءِ پلہ مرزی کرتگ ءُ گوشتگ کہ ما گوں کراچی ءِ جاہ منندیں انسان دوست، نودربر، اھوالکارءُ انسانی ھکؔانی سر ءَ بیسہ داروکیں گلانی گون ءَ دزبندی کن ایں کہ اے گرانیں ساھتاں زاھد الی ءِ کھول ءِ ھمراھداری بہ کن اَنت ءُ زھرشانی پتر ءَ گیش ءَ چہ گیش بھر بہ زور اَنت۔
