شال: مستونگءَ چہ پاکستانی پوج ءِ دست ءَ کشگ بیتگیں ورنا اھسان شاہ ءِ کھول ءِ زھرشانی ءَ شال پریس کلبءِ دیمءَ نُھ روچ سرجم بیتگ۔ دوشی پولیس ءَ زھرشانی نندانک ءَ بیڑ برتگ ءُ بینر، پلے کارڈ ءُ سامان پروشتگ اَنت۔
اے بابتءَ اھسان شاہ ءِ مات ءِ گوشگ اِنت کہ من ءَ نُھ روچ اِنت کہ پریس کلب ءِ دیم ءَ زھرشانی ءَ نشتگ آں دوشی پولیس اتکگ ءُ منی کالین، بینر ءُ آدگہ سامان پرشت ءُ پرش کرتگ اَنت ءُ نزیکیں دکانداران ءَ گوشتگ کہ آ منی کمک ءَ مہ کن اَنت۔ اگاں نہ ما شمئے بگیری ءَ کاروائی کن ایں۔ مرچی سھب ءَ من اد ءَ اتکگ آں ڈی ایس پی منی سر ءَ اوشتاتگ کہ تو پاد ءَ برو۔
آئیءِ گوشگ اِنت من یک جنینے آںءُ اد ءَتھنا یان ءُ پہ وتی زھگ ءِ کشندھانی دزگیر کنگ ءَ زھرشانی کنگ ءَ آں، من دگہ ھچ نہ لوٹ آں ءُ بس انساپ لوٹگ ءَ آں۔آئی ءَ من ءَ دزگیری ءِ بیھار داتگ گڑا من گوشتگ کہ منی میار چے اِنت۔ شال پریس کلب ءِ دیم ءَ نندگ ءُ زھرشانی کنگ منی کانودی ھک اِنت۔
آئیءَ گوشتگ کہ من وتی بلوچ راج ءَ گوش آں کہ من یک بلوچ جنینے آں اگاں منءَ شمئے دیم ءَ پولیس دزگیر بہ کنت ءُ بہ بارت گڑا پد ءَ پہ اد ءِ بلوچاں چے پشت کپ ایت کہ یک بلوچ جنینے چہ آیانی دیم ءَ برگ بیتگ۔ من گوں درسیں بلوچ راجءَ لوٹ کن آں بیا اَنت ءُ من ءَ کمک بہ کن اَنت۔
