شال: پہ زوربیگواھیں مردمانی پد جنگ ءَ برجاھیں وی بی ایم پی ءِ گدان ءَ 5698 روچ سرجم بوتگ۔ چہ پَنجگُور ءَ سیاسی ءُ چاگردی جھدکار داد مھمد، التاپ، منزور ءُ آدگہ مردم گوں زوربیگواھیں مردمانی کھولاں پہ ھمدردی درشان کنگ ءَ گدان ءَ آتکگ اَنت۔
وی بی ایم پی ءِ کمک سرکماش ماما کدیر ءَ گوں مردماں تران کرتگ ءُ گوشتگ کہ ھما مردم کہ وتی راج ءُ راجی پجار ءَ دوست دار اَنت، گچین کنگ ءُ کشگ بیگ ءَ اَنت۔ بلوچ دانشور، نبشتہ کار ءُ شائر بلوچ چکچینی ءِ بابت ءَ گیش ءَ چہ گیش سرپد بہ بنت۔
آئی گوشتگ کہ مئے جھد پُرایمن اِنت زوربیگواھیں مردمانی گدان بلوچستان ءَ یک انچیں زھرشانی بنجاھے کہ اد ءَ زوربیگواھیں مردمانی ءُ شھیدانی کھول کاینت ءُ اے جیڑہ ءَ پدّر کن اَنت ءُ انساپ ءِ لوٹ ءَ کن اَنت۔ بلے ھروچ ماندارگ بیت۔
