بلوچ نیشنل موومنٹ ( بی این ایم ) ءِ جرمنی تک ءِ سالی نیاد گل ءِ سرکماش ڈاکٹر نسیم ءِ پاگواجھی ءَ برجم دارگ بیتگ ۔ ھنوپر ءَ بیتگیں اے سالی نیاد ءَ باسکاں گل ءِ کارکرد ءُ کارانی سر ءَ دلجمی ءَ گپ ءُ تْران کرتگ۔
نیاد ءَ گل ءِ سرکماش ڈاکٹر نسیم ءَ گل ءِ راہ ءُ راھبندانی پاسداری ءِ سر ءَ زور دیان ءَ گْوشتگ چہ گل ءِ بنجاہ ءِ توانمندی ءَ گل مگیم بیت ، پمیشکا مارا گل ءِ بنجاہ توانمند کنگی اِنت۔
آئی ءَ گْوشتگ گل چہ وتی باسکاں گل ءِ راھبندانی پاسداری ءِ لوٹ ءَ کنت۔مارا پہ وتی کاراں گل ءِ آئین ءَ داتگیں رد ءُ بند ءُ راھبندانی انان گْور کنگی اِنت۔
بی این ایم جرمنی تک ءِ سالی کارکردی گزارش ءِ رد ءَ ، چہ بی این ایم ءِ نیمگ ءَ ھنوپر، این آر ڈبلیو ، برانڈن برگ ءِ پجیگ ءَ جرمنی ءِ جتائیں شھراں چہ 34 ءَ گیش زھرشانی کنگ بیتگ، جتائیں شھراں چہ شش ءَ گیش بر ءَ مردماں سرپدی دیگ ءِ مراگش ءُ پنچ زانشتجاھی مراگش برجم دارگ بیتگ۔جرمنی ءَ بی این ایم ءِ باسکاں چہ شش ءَ گیش میان راجی مراگشاں بھر زرت ءُ 23 ءَ گیش مردمانی مچی ، مردمی ھکانی مراگش ءُ ربیدگی مراگاہ برجم دارگ بیتگ۔
بی این ایم جرمنی تک ءِ کارگشاد جبار ءَ وتی گزارش ءَ گْوشتگ کہ جرمنی تک ءَ بلوچ ءِ ھکانی بگیری گچینی پاکستانی لشکر ءِ زوراکیانی سھرا کنگ ءَ زھرشانی ، سسا تْرانی نیاد ( سیمینار ) ، وانگ ءُ زانگی نیاد ءُ سپارتی گند ءُ نند کرتگ۔
بی این ایم جرمنی ءِ سالی نیاد ءَ اے مسام سرسبزینگ بیتگ کہ بلوچ ءِ مردمی ھکانی جیڑہ ءُ آجوئی ءِ لوٹ ءَ جھانی تک ءَ چد ءُ گیش سھرا کنگ ءَ کوشست تیز کنگ بہ اَنت۔
بی این ایم ءِ دری کارانی کارگشاد فھیم نیاد ءِ گچینی مھمان اَت۔نیاد جرمنی تک ءِ کماش شرھسن ءِ چارگزاری ءَ بیتگ ءُ جرمنی تک ءِ کارگشاد جبار ءَ جارچینی کرتگ۔
