کیچ ءِ جتائیں ھنداں پاکستانی پوج ءُ آئی جوڑ کرتگیں کشندہ ٹولی ءِ ارشانی آسر ءَ سے جنین ءُ سے زھگاں ھوار شش مردم ٹپی بیتگ ءُ زھگے بیران بیتگ۔
زرمبش جگیر ءِ رد ءَ دوشی دوازدہ ءَ پاکستانی پوج ءَ تمپ ءِ میتگ کلاھو ءَ ابدرھمان نامیں مردمے ءِ گسے ءِ سر ءَ تیرگواری کرتگ کہ اود ءَ زلیکہ نامیں جنینے ءَ ھوار ماجد نامیں زھگے ھم ٹپی بیتگ۔ زلیکہ ءِ جاور ناگیگ اَنت پہ الاج کنگ ءَ نادراھجاہ ءَ برگ بیتگ۔
اے ویل ءِِ بگیری ءَ مردماں پاکستانی پوج ءِ بنجل ءِ دیم ءَ زھرشانی کرتگ ءُ انساپ ءِ لوٹ کرتگ۔
بنشون ءِ رد ءَ دوشی تربت ءِ ھند آپسر بلوچی بازار ءَ ھدا بکش نامیں مردمے ءِ گس ءَ دستی بمب ارشے ءَ دو جنین ساھبہ ھاتون ءُ شادہ ٹپی بیتگ اَنت آ پہ الاج کنگ ءَ تربت نادراھجاہ ءَ برگ بیتگ اَنت۔
انچوش گمان کنگ بوگ ءَ اِنت کہ اے دستی بمب ارش پاکستانی پوج ءِ جوڑ کرتگیں کشندہ ٹولی ءِ کارمنداں کرتگ۔
ھمے وڑ ءَ دوشی تمپ ءَ چہ پاکستانی پوج ءِ مارٹر گولا آس دیگءَ سے زھگ ٹپی بیتگ۔ آیانی نام ابداللہ ء پھد، سالہ ء گپور ءُ پازل ء پیسل اِنت۔ دگہ یک دہ سالی زھگے مھمد ابدُلگپور بیران بیتگ۔
