چہ ڈیرہ بگٹی ءِ جتائیں ھنداں پاکستانی پوج ءَ شش مردم آوار جتگ ءُ بیگواہ کرتگ۔
اھوالکار ءِ رد ءَ مرچی سھب ءَ مھلہ ڈیرہ بگٹی ءِ ھند سوئی شھر ءَ پاکستانی پوج ءَ موچی ء ھیر مھمد بگٹی نامیں مردمے بنجل ءَ لوٹائینتگ ءُ بیگواہ کرتگ۔ زور بیگواھیں موچی ءِ بابت ءَ گوشگ بیت کہ پوج ءَ دو ھپتگ پیش آئی زھگ آوار جتگ ءُ بیگواہ کرتگ، مرچی پون کرتگ ءُ لوٹائینتگ بیا تئی زھگ ءَ یل کن ایں پد ءَ آئی ءِ جند بیگواہ کنگ بیتگ۔ ھمے ھند ءَ مرچی سھب ءَ پاکستانی پوج ءَ دگہ گولا ء اسلم کیھتران نامیں مردمے آوار جتگ ءُ بیگواہ کرتگ۔
بنشون ءِ رد ءَ سوئی ءِ شھر بگٹی کالونی ءَ دو اگست ءِ سھب ءَ پاکستانی پوج ءُ سی ٹی ڈی ءَ ھوٹلے ءَ بیڑ برتگ ءُ ھپیز ء ھاوند بکش بگٹی نامیں مردمے آوار جتگ ءُ بیگواہ کرتگ۔
ھشت اگست ءَ پاکستانی پوج ءَ چہ سوئی ءِ آر ڈی 238 پھل ءَ سجاد پنام جادا بگٹی نامیں ورنایے آوار جتگ ءُ بیگواہ کرتگ۔ سے اگست ءَ سوئی ءَ بگٹی کالونی ءَ پاکستانی پوج ءَ گسے ءَ بیڑ برتگ ءُ ھزارہ ء نوزھا بگٹی نامیں ورنایے آوار جتگ ءُ بیگواہ کرتگ۔
انچوش گوشگ بوگ ءَ اِنت کہ چہ ڈیرہ بگٹی ءَ پاکستانی پوج ءَ باز مردم آوار جتگ ءُ بیگواہ کرتگ چہ نیٹ ءِ نہ بوگ ءِ سوب ءَ انگت ءَ پجارگ نہ بیتگ اَنت۔
