اسلام آباد ءَ برجاھیں زھرشانی ءَ بی وائی ءِ سروک سمی دین ءَ تران کرتگ ءُ گوشتگ کہ گوستگیں بیست ءُ شش روچانی میان ءَ زھرشانی ءَ نشتگیں مات ، گھارءُ زھگاں وتی ھک ءِ جنگ ءُ گھگیری پیش داشتگ آ ستا کرز اَنت۔ اسلام آباد ءِ اے گرم ءَ مردم وتی گسانی تہ ءَ ھم نشت نہ کن اَنت، بلے اے مات ءُ گھار گوستگیں بیست ءُ شش روچ اِنت کہ بے آسراتی ءَ دگ ءِ سر ءَ نشتگ اَنت۔ اے گرم ءُ سارت، ریاستی زوراکی ءُ جنجالاں آیانی توکل نزور نہ کرتگ۔
آئی ءَ گوشتگ کہ بلوچ ءُ ریاست ءِ سیادی ھمیش اِنت کہ ریاست گوستگیں ھپتاد ءُ ھپت سال اِنت گوں زوراکیاں پیش دارگ ءَ اِنت۔ بلے چہ ایشی ءَِ ابید ھمک وھد ءَ بلوچ ریاست ءِ دروازگ ءَ ٹک ایت۔ اد ءَ اسلام آباد ءَ ریاست ءِ درسیں توانمندیں ادارہ ساڑی اَنت بلے ھمد ءَ کمیں گام ءِ دوری ءَ نشتگیں بلوچ مات ءُ گھارانی توار گوش دارگ بوگ ءَ نہ اِنت۔ بلے بلوچ ءَ گوں وتی راجمستری ءُ پر ایمنیں جھد ءَ نہ گوستانکے زندگ دارگ ءَ اِنت بلکیں ریاست ھمک پندل ءَ بے سوب کنگ ء اِنت۔ بلوچ ءَ چہ گوستگیں بیست سالانی جھد ءَ ریاست ءِ درسیں ٹاپار ءُ پندل پاشک کرتگ اَنت۔ ھمے سوب ءَ اے پیریں مات ءُ گھاراں ھم ریاست اوپار کرت نہ کنت۔
سمی دین ءَ گوشتگ کہ مئے چہ درساں مستریں سوبمندی ھمیش اِنت کہ ما ریاست ءِ درسیں پندلاں بے سوب کنگ ءَ ایں۔ ریاست مارا ھمک بر ءَ ھمے سرپد بوگ ءَ اِنت کہ اے مردم داں بیست روچ ءُ ماھے ءَ پد بے اوست بنتءُ رو اَنت، من ریاست ءَ ھمے گوش آں کہ اے مردم مرچی ھم بے اوست بہ بنت دومی بر ءَ الم تئی دروازگ ءِ دپ ءَ کاینت ءُ اوشت اَنت۔ اے مات ءُ گھار چہ تئی زوراکیاں دربرگ ءَ اَنت، ایشاں گھگیری تو ھیل دیگ ءَ ئے۔ ایشاں تو وت پیش دارگ ءَ ئے کہ گھگیری چی یے۔
آئی ءَ گوشتگ کہ اے گرم ءِ سر ءَ نشتگ ءُ زوراکی آماچیں مات ءُ گھارانی چہ توکل ءَ شما گمان کرت کن اِت کہ اے دگہ چنچو زوراکی اوپار کرت کن اَنت۔
