تربت: پاکستانی پوج ءِ دست ءَ زور بیگواہ کنگ بیتگیں ورنا ڈاکٹر داد شاہ ءِ کھول ءَ تُربَت پریس کلب ءَ پریس کانپرنس کرتگ ءُ آئی یل نہ کنگ ءِ بگیری ءَ زھرشانی ءَ سی پیک دگ ءِ بند کنگ ءِ جار جتگ۔
کھول ءِ گوشگ اِنت کہ ڈاکٹر داد شاہ بلوچ ء ھدا بکش تجابان سنگ آباد ءِ جاہ منند اِنت کہ چار اگست 2025 ءَ چہ وتی ڈیوٹی ءَ گس ءَ آھگ ءَ بیتگ کہ نیمروچ ءِ دو ءَ پاکستانی پوج ءَ چہ کیچ کور ءِ پھل ءَ آوار جتگ ءُ بیگواہ کرتگ۔
کھول ءِ گوشگ اِنت کہ آئی بیگواھی ءَ ھپتگے گوستگ ڈاکٹر داد شاہ نہ آمیدگس ءَ پیش کنگ بیتگ ءُ نہ آئی بابت ءَ کھول سھی کنگ بیتگ۔ چہ ایشی ءَ ما پہ آئی جان سلامتی ءَ ترسگ ءَ ایں۔
کھول ءَ گوں سرکار ءَ لوٹ کرتگ اگاں آئی سر ءَ چونیں بھتامے ھست گڑا آمیدگس ءَ پیش کنگ بہ بیت۔ آئی زوریں بیگواھی وت کانود ءِ بگیری اِنت۔
کھول ءَ گوشتگ کہ ما داں یازدہ اگست ءَ پہ ڈاکٹر داد شاہ ءِ آجوئی ءَ وداریگ ایں، اگاں یل کنگ نہ بوت گڑا ما دوازدہ اگست ءَ تجابان ءَ سی پیک دگ ءَ بند کن ایں۔ اے بابت ءَ مئے گون ءَ سیاسی ءُ چاگردی کارکن، نودربر گل، وکیل، نودربر ءُ لس مھلوک اے انسانی جیڑہ ءِ بنیاد ءَ مئے گون ءَ کمک بہ کن اَنت۔
آئی ءَ گوشتگ کہ ما تربت ءُ شال ءَ سپر کنوکیں مردم ءُ گاڑی واھنداں سھی کن ایں کہ 12 اگست ءَ سی پیک دگ زھرشانی ءَ بند کنگ بیت۔ مردم چہ وتی جنجالاں پھریزگ ءَ آدگہ راھاں بہ رو اَنت۔
