کراچی: ریاستی ادارھانی دست ءَ زور بیگواھیں زاھد بلوچ ءِ کھول ءِ زھرشانی ءَ شش روچ سرجم بیتگ کہ انگت ءَ برجاہ اِنت۔ زاھد بلوچ ءِ کھول ءِ آدگہ مردماں ھوار آئی پت نادراہ اِنت بلے انگت ءَ زھرشانی نندانک ءَ ساڑی اِنت۔
چہ زھرشانی جاہ ءَ ابدالھمید ءِ گوشگ اِنت کہ زاھد بلوچ ءَ مزدوری کرتگ ءُ گس ءِ والینگ ءِ ھواری ءَ منی نادراھی ءِ الاج ھم کرتگ۔
آئی گوشگ اِنت کہ من گوں نادراھی ءِ جاوراں ھمے اوست ءَ اد ءَ نشتگ آں کہ ریاستی ادارہ پما رھم کن اَنت ءُ منی زھگ ءَ آجو کناھین اَنت۔ ھمک شھری ءَ زند گوازینگ ءِ ھک ھست بلے ریاست ءَ اچما مئے ھک پل اِتگ۔
ابدالھمید ءَ گوں انسانی ھکانی گل، مزن آمیدگس، رسانکدر ءُ گوں درسیں انسان دوستیں بھرگاں لوٹ کرتگ کہ آ پہ زاھد بلوچ ءِ آجوئی ءَ وتی کرد ءَ پیلو بہ کن اَنت۔
چوش کہ زاھد بلوچ 17 جولائی 2025 ءَ ریاستی ادارھاں آوار جتگ ءُ بیگواہ کرتگ کہ آ انگت ءَ بیگواہ اِنت۔
