اسلام آباد ءَ پہ بلوچ یکجھتی کمیٹی ءِ سروک ءُ زور بیگواھیں مردمانی آجوئی ءَ زھرشانی ءَ بیست ءُ شش روچ سرجم بیتگ کہ انگت ءَ برجاہ اِنت۔ زھرشانی ءَ انچو روچ ءِ گوزگ ءَ ابید ھم چہ سرکار ءِ نیمگ ءَ پہ آیانی لوٹانی منّگ ءَ ھچ وڑیں گامگیج زورگ نہ بیتگ۔
آیانی گوشگ اِنت کہ مئے یکشلیں جھد ءَ جھان ءِ دیم ءَ ھمے گپ پیش کرتگ کہ بلوچ راج انسانی گوستانک ءِ گوں مستریں جھد ءُ جنگے ءَ دیم پہ دیمی کنگ ءَ اِنت۔ ھمے مات پہ زوراکی ءُ رنجانی بگیری ءَ اوشتاتگ اَنت مرچی آیانی کوھیں توکل گھگیری ءِ چیدگ جوڑ بیتگ اَنت۔
آیانی گوشگ اِنت کہ سرکار ءِ یکشلیں نادرسی مئے توکل ءَ پروش دات نہ کنت، بلکیں آئی اے نزام پاشک بوگ ءَ اِنت کہ آ بلوچ چکچینی کنگ ءَ اِنت۔
آیانی گوشگ اِنت کہ مئے اے زھرشانی ءِ ھمک دمان ریاست، آئی رسانکدر، آمیدگس ءُپارلیمنٹ ءِ بے سوبی ءَ پیش دارگ ءَ اِنت کہ آ تھنا پندل سازی کنگ ءَ اَنت۔
آیانی گوشگ اِنت ما پہ وتی ھکی ئیں لوٹاں وتی زھرشانی ءَ برجاہ دار ایں۔ دانکہ بی وائی سی ءِ سروک ءُ بیگواھیں مردمانی یل کنگ نہ بیتگ اَنت مئے زھرشانی برجاہ بیت۔
