کیچ ءِ ھند تمپ ءَ پاکستانی پوج ءِ جوڑ کرتگیں ھندی کشندہ ٹولی ءِ کارمنداں گسے ءَ دستی بمب اُرشے کرتگ۔
زرمبش جھگیر ءِ رد ءَ دوشی دو ءُ نیم ءَ تمپ ءِ میتگ میرآباد ءَ کشندہ ٹولی ءِ کارمنداں لکمان بلوچ نامیں مردمے ءِ گس گوں دستی بمب ءَ نشانگ کرتگ ءُ رند ءَ دو تیر ھم جتگ۔ اُرش ءِ آسر ءَ انگت ءَ دگہ جانی تاوان ءِ ھال نیست۔
ھندی بنشون ءِ رد ءَ کشندہ ٹولی ءِ کارمنداں یک موٹر سائیکلے ءُ اسپیتیں کرولا گاڑی یے ھم گون بیتگ کہ آیاں گس ءَ اُرش کرتگ۔ اُرش ءَ پد کشندہ ٹولی ءِ کارمند پاکستانی بنجل ءَ روگ ءَ گندگ بیتگ اَنت
چوش کہ ایشی ءَ پیش تمپ ءِ کونشکلات ءَ بلوچی زبان ءِ آشوبی گشندہ استاد منھاج مکتار ءِ لوگ ءِ سر ءَ ھم باز بر ءَ ارش کنگ بیتگ۔ کمیں روچ پیش تمپ ءِ میتگ بالیچہ ءَ یک اگست ءَ ریاستی کشندہ ٹولی ءِ کارمنداں جنگیان بلوچ ءِ گس ءَ دستی بمب اُرش کرتگ اَت۔
بلکیں تمپ ءَ تھنا اے ویل نہ اَنت چہ ایشاں ابید کشندہ ٹولی ءِ کارمنداں دگہ بازیں گساں ارش کرتگ ءُ گوں مردماں زوراکی کرتگ۔
