بلوچ یکجھتی کمیٹی ءِ سروک ءُ زوربیگواھیں ڈاکٹر دین مھمد جنک سمی دین بلوچ ءَ وتی شنگ کرتگیں درشانے ءَ گوشتگ که کھول په انساپ ءَ چه بلوچستان ءَ اسلام آباد ءَ اتکگ اَنت که آیانی توار گوش دارگ به بیت بلے آیاں پریس کلب ءِ دیم ءَ نندگ ءِ موکل دیگ ءَ نه اَنت۔
آئی ءَ گوشتگ که آیانی چپ ءُ چاگرد ٹٹ کنگ بیتگ ، آیانی گس ءَ شتگءُ آیاں آزار داتگ ءُ چه گس ءَ در کرتگ اَنت۔ انوں آ یاں پریس کلب ءِ پشت ءَ ٹٹانی میان ءَ گوں ایمنی ءُ بے توار ءَ وتی زھرشانی برجاہ داشتگ ۔ اے مردم ھمک روچ دگ ءِ سر ءَ نشتگ ءُ جتائیں دروشم ءَ وتی گم ، درد ءُ رنجاں گوں بے تواری ءَ پیش دارگ ءَ اَنت۔
سمی دین ءَ گوشتگ که چه ایشی ءَ ابید هم لھتیں وھداں آیانی بگیری کنوکیں ٹولی آیانی دیم ءَ نند اَنت ءُ آیانی توار ءِ بند کنگ ءِ جھد ءَ کن اَنت یا وتگڑیں اھوالکار کاینت ءُ آیاں بلوچستان ءَ بوتگیں اُرشانی ایر جنگ ءَ لاچار کن اَنت ، ھمے میان ءَ ایمنیں زھرشانی کنوکانی سر ءَ بھتام جن اَنت ءُ په آیانی جھد ءِ بے سوب کنگ ءَ جتائیں پندل کارمرز کن اَنت ، چه ایشی ءَ ابید هم آ گوں سبر ءُ توکل ءَ ھمے اوست ءَ نشتگ اَنت که یک ھمدردیں مردمے آیانی توار ءَ گوش بدارایت ، چه اے جنجال ءُ آزاراں ابید مردم گوں ایمنی ءَ نشتگ ءُ زھرشانی کنگ ءَ اَنت۔
