اسلام آباد ءَ پہ بلوچ یکجھتی کمیٹی ءِ سروک ءُ زور بیگواھیں مردمانی پد جنگ ءَ زھرشانی ءَ مرچی بیست ءُ پنچ روچ سرجم بیتگ کہ انگت ءَ برجاہ اِنت۔ ھمک روچ سیاسی ءُ انسانی ھکانی کارکن پہ کھولانی ھمدردی درشان کنگ ءَ زھرشانی جاہ ءَ پیداک اَنت۔
زھرشانی نندانک ءَ کسانیں زھگاں ھوار پیرزال ھم ھوار اَنت۔ چہ بیست ءُ پنچ روچ ءِ سرجم بوگ ءَ ابید ھم چہ سرکار ءِ نیمگ ءَ پہ آیانی لوٹانی گوشگ دارگ ءَ ھچ وڑیں گامگیج زورگ نہ بیتگ۔
زھرشانی کنوکیں مردمانی گوشگ اِنت کہ مئے زھرشانی ءَ بیست ءُ پنچ روچ سرجم بیتگ بلے ما انگت ءَ کسے ءَ یک کسانیں تاوانے ھم نہ داتگ۔ نہ گاڑی یے ءِ شیشگ پروشتگ ءُ نہ پولیس ءِ سر ءَ اُرش کرتگ۔ مئے لوٹ ڈیھ ءِ کانود ءُ راھبند ءِ بنیاد ءَ اَنت۔
آیانی گوشگ اِنت کہ مئے لوٹ ھمیش اَنت مئے مردم آجو کنگ ءُ بلوچستان ءَ زوریں بیگواھی بند کنگ بہ بیت۔ بلے مئے زھرشانی ءَ انچو روچ گوستگ انگت ءَ چہ سرکار ءِ نیمگ ءَ پہ مئے لوٹانی منگ ءَ ھچ وڑیں دلجمیں گامگیج زورگ بوگ ءَ نہ اِنت۔
آیانی گوشگ اِنت کہ مئے لوٹانی پیلو نہ کنگ ءُ چہ مئے پرایمن بوگ ءَ ابید ھم سرکار مئے زھرشانی ءِ ھلاس کنگ ءِ جھد ءَ اِنت۔ دانکہ مئے لوٹ منگ نہ بیتگ اَنت ما وتی زھرشانی ءَ برجاہ دار ایں۔
