کراچی: پاکستانی پوج ءِ جوڑ کرتگیں چیریں ادارھانی دست ءَ زور بیگواہ کنگ بیتگیں زاھد بلوچ ءِ کھول ءِ نیمگ ءَ پنچ روچ اِنت کہ کراچی پریس کلب ءَ زھرشانی برجاہ اِنت۔
زھرشانی ءَ زور بیگواھیں زاھد بلوچ ءِ سیاد، سیاسی، چاگردی کارکن، نودربر، انسانی ھکانی کارکناں ھوار جتائیں بھرگاں سیادی داروکیں مردماں بازیں کچے ءَ پہ ھمدردی درشان کنگ ءَ بھر زرتگ۔
زھرشانی ءَ بینرءُ پلے کارڈ ایر کنگ بیتگ اَنت کہ آیانی سر ءَ پہ زاھد بلوچ ءِ آجوئی ءُ آمیدگس ءَ پیش کنگ ءَجتائیں اوگام نبشتگ۔
زھرشانی ءِ پنچ روچ ءِ گوزگ ءَ پد ھم چہ سرکار ءُ دمگی انتزامیہ ءِ نیمگ ء پہ آئی آجوئی ءَ ھچ وڑیں دلجمیں گامگیج زورگ نہ بیتگ۔ آئی پت نادراھیں مردمے بلے چہ وتی زھگ ءِ زوریں بیگواھی ءَ لاچار اِنت کہ زھرشانی ءَ نشتگ۔
کھول ءِ گوشگ اِنت دانکہ مئے زھگ آجو نہ بیت مئے زھرشانی برجاہ بیت۔ اگاں زاھد بلوچ ءِ سر ءَ چونیں بھتامے ھست گڑا آمیدگس ءَ پیش کنگ بہ بیت۔
چوش کہ زاھد بلوچ کراچی زانشتجاہ ءِ نودربرے ءُ آئی چہ وانگ ءَ پد رکشہ ءِ سر ءَ مردم کش اتگ ءُ گس والینتگ۔ زاھد بلوچ ءَ 17 جولائی ءَ پاکستانی چیریں ادارھاں آوار جتگ ءُ بیگواہ اِنت۔ آئی زوریں بیگواھی ءَ بیست روچ گوستگ بلے انگت ءَ آئی ھچ وڑیں ھال نیست۔
