اسلام آباد ءَ بلوچ یکجھتی کمیٹی ءِ سروک ءُ زور بیگواھیں مردمانی کھولانی نیمگ ءَ برجاھیں زھرشانی ءَ مرچی بیست ءُ دو روچ سرجم بیتگ۔ چو مدامی وڑ ءَ کھولاں مرچی ھم زھرشانی روانکے کش اتگ۔
زھرشانی کنوکیں مردماں بی وائی سی ءِ بندیگیں سروک ءُ زور بیگواھیں مردمانی اکسءُ بینر گوں بیتگ اَنت ءُ آیاں پہ وتی لوٹانی ھک ءَ اوگام جتگ۔
اے بابت ءَ بی وائی سی ءِ گوشگ اِنت کہ اے بیست ءُ دوئیں روچانی میان ءَ زھرشانی کنوکیں جنین ءُ زھگاں کیمپ جنگ ءَ نیلگ ءَ اَنت۔ نیشنل پریس کلب ءِ درسیں دگ بند کنگ بیتگ اَنت زھرشانی کنوکیں مردم دگ ءِ پھنات ءَ نندگ ءَ لاچار اَنت۔ بلے سانمندیں کھول یکشل ءَ ترسینگ ءُ بیھار دیگ بوگ ءَ اَنت۔
آئی ءَ گوشتگ کہ پاکستان سرکار آیان ءَ پر ایمنیں زھرشانی ءِ ھک ءَ دیگ ءَ نہ اِنت۔ چہ آیانی لوٹانی گوش دارگ ءَ ابید چہ ریاست ءِ نیمگ ءَ نشانگ کنگ ءُ ترسینگ بوگ ءَاَنت۔ بلے چہ اے درسیں زوراکیاں ابید اے کھول پہ وتی لوٹاں زھرشانی ءَ نشتگ اَنت۔ آیانی گوشگ اِنت کہ بی وائی سی ءِ سروک ءُ بیگواھیں مردم یل کنگ ءُبلوچستان ءَ زوریں بیگواھی بندکنگ بہ بیت۔
