پلستین؛ گزہ ءَچہ اسرائیل ءِ نوکیں ارشاں کم چہ کم دگہ 68 پلستینی مرتگ۔ ایشانی تہ ءَ گیشتر ھما مردم اَنت پہ کمکی سامان ءِ گرگ ءَ اوشتوک بیتگ اَنت۔
جھانی رسانکدر ءِ رد ءَ ھان یونس ءِ نزیک ءَ اسرائیلی پوج ءَ پہ کمکی ساماناں مچ بیتگیں مردمانی سر ءَ تیرگواری کرتگ ءُ سی مردم کشتگ۔
گوریچانی گزہ ءَ زکیم سیمسر ءِ گوزراہ ءِ نزیک ءَ چہ اسرائیلی پوج ءِ تیرگواری ءَ بیست مردم مرتگ ءُ سد ءَ چہ گیش مردم ٹپی بیتگ اَنت۔ زکیم گوزراہ ھما جاہ اِنت کہ انوں لھتیں ھپتگاں کمکی سامان ءَ باریں لھتیں گاڑی آتکگ۔
اے بابت ءَ اسرائیلی پوج ءِ گوشگ اِنت کہ مئے پوجیاں زرباری گزہ ءَ کوریڈور ءَ پہ لھتیں مردمانی کڈن کنگ ءَ تیرگواری کرتگ انگت ءَ دگہ جانی تاوان ءِ ھال نیست۔
اے ویل ءِ آسر ءَ گزہ ءَ مردم پہ وردن، آپ ءُدرمان ءَ سکا جنجال اَنت۔
