شال: پہ زوربیگواھیں مردمانی پد جنگ ءَ وائس پار بلوچ مسنگ پرسن( بی وی ایم پی ) ءِ زھرشانی گدان ءَ 5901 روچ سرجم بیتگ۔ سے شمبے ءِ روچ ءَ زوربیگواھیں ابدرزاک ء ِ کھول زھرشانی گدان ءَ اتکگ ءُ آئی کیس گل ءِ کِر ءَ یاداشت کرتگ۔
وی بی ایم پی ءِ سرکماش نسر اللہ بلوچ ءَ گوشتگ کہ ابدرازک ءُآئی برات مھمد اسھاک ءِ کیس چہ گل ءِ نیمگ ءَ پہ زوربیگواھیں مردماں جوڑ بیتگیں کمیشن ءُ بلوچستان سرکار ءَ داتگ، مھمد اسھاک آجو بیتگ بلے ابدرزاک انگت بیگواہ اِنت۔
آئی ءَ گوں سرکار ءَ لوٹ کرتگ ءُ گوشتگ کہ ابدرزاک ءِ سر ءَ چونیں بھتامے ھست گڑا آمیدگس ءَ پیش کنگ بہ بیت ءُ ڈیھ ءِ کانود ءِ رد ءَ آئی ءَ وتی بے میاری پیش کنگ ءِ موہ دیگ بہ بیت۔ اگاں آمیدگس ءَ میاربار لیک اِت گڑا ڈیھ ءِ کانود ءِ رد ءَ چونیں سزا دیگ بوت ما ءُ آئی کھول ھچ گلگ نہ کن ایں۔
نسر اللہ بلوچ ءَ گوشتگ کہ ابدرزاک ءِ زور بیگواہ کنگ ءُ آئی کھول ءَ آئی بابت ءَ ھچ سرپدی نہ دیگءُ جنجال کنگ ڈیھ ءِ کانود ءُ انسانی ھکانی ناھکیں بگیری اِنت۔ ایشی من ایر جن آں ءُ پہ ابدراک ءِ آجوئیءِ لوٹ ء کن ایں۔
