شال: پہ زور بیگواھیں مردمانی پد جنگ ءَ وی بی ایم پی ءِ شدکشیں زھرشانی گدان ءَ 5898 روچ سرجم بیتگ۔ شمبے ءِ روچ ءَ جتائیں بھرگاں سیادی داروکیں مردم پہ ھمدردی درشان کنگ ءَ گدان ءَ اتکگ اَنت۔
اے بابت ءَ وی بی ایم پی ءِ سرکماش نسراللہ بلوچ ءِ گوشگ اِنت کہ زوریں بیگواھی انسانی ھکانی ناھکیں بگیری اِنت۔
آئی ءَ لوٹ کرتگ ءُ گوشتگ کہ درسیں زور بیگواھیں مردم دیم ءَ آرگ بہ بنت ءُ آیاں کانود ءِ ھک دیگ بہ بیت، درکانودی زوریں بیگواھی بند کنگ ءُ زور بیگواھیں مردم آجو کنگ بہ بنت۔ بیگواھیں مردمانی درکانودی کوش بند کنگ بہ بیت ءُ زوریں بیگواھی ءِ جیڑہ ڈیھ ءِکانود ءِ رد ءَ گیش ءُ گیوار کنگ بہ بیت۔
نسر اللہ بلوچ ءَ گوشتگ کہ بلوچستان ءِ جیڑہ سیاسی جیڑھے گوں سیاست ءَ گیش ءُ گیوار کنگ بہ بیت ءُ بلوچستان ءَ زور کار مرز کنگ ھم بند کنگ بہ بیت۔
