تربت: پاکستانی پوج ءِ دست ءَ زور بیگواھیں سھیل ابداللہ ءِ کھول ءَ پہ آئی آجوئی ءَ لوٹ کرتگ ءُ گوشتگ کہ پاکستانی پوج ءِ دست ءَ سھیل ابداللہ ءِ زوریں بیگواھی ءَ سالے سرجم بوگ اِنت کہ انگت ءَ آئی ھچ وڑیں ھال نیست۔
آئی ءَ گوشتگ کہ سھیل ابداللہ تمپ ءِ میتگ دازن ءِ جاہ منند اِنت 11 اکتوبر 2024 ءَ چہ بھمن ءَ آوار جنگ ءُ بیگواہ کنگ بیتگ۔ ما یکشل ءَ پہ آئی آجوئی ءَ توار چست کنگ ءَ ایں بلے انگت ءَ پہ آئی آجوئی ءَ ھچ وڑیں گامگیج زورگ نہ بیتگ۔
کھول ءَ گوشتگ کہ سھیل ھما وھد ءَ آوار جنگ بیتگ آ چہ نادراھی ءِ سوب ءَ وتی سنگتے ءِ گس ءَ بیتگ کہ نادراھجاہ نزیک اِنت ءُ آ ڈاکٹر ءَ شت ءُ آھت بہ کنت۔ بلے گوں نادراھی ءِ جاوراں پاکستانی پوج ءُ چیریں ادارھانی کارمنداں آوار جتگ ءُ بیگواہ کرتگ۔
آئی ءَ گوشتگ کہ سھیل ابداللہ ءِ کماش ءَ آئی بیگواھیءِ گرانیں گم اوپار کرت نہ کرتگ ءُ بیران بیتگ ءُ نوں آئی مات ھمک روچ وتی زھگ ءِ رھچار اِنت۔
کھول ءَ گون انسانی ھکانی ادارھاں لوٹ کرتگ کہ پہ سھیل ءِ آجوئی ءَ وتی کرد ءَ پیلو بہ کن اَنت۔
