بلوچ لبریشن آرمی (بی ایل اے) ءِ جارکش جیھند بلوچ ءِ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں مچ، شال ءُ ھوشاپ ءَ سَے چریک کشتگ۔
آئی گوشتگ کہ بی ایل اے ءِ سرمچاراں پرندوشی مچ ءَ دربار ھوٹک ءِ نزیک ءَ زورگریں پاکستانی پوج ءِ چریک نوید سمالانی جاہ منند سمالانی کالونی تیرگواری کرتگ ءُ کشتگ۔ کشگ بوتگیں مردم زورگریں پاکستانی پوج ءُ چیریں ادارھانی جوڑ کرتگیں کشندہ ٹولی ءِ کارمندے بوتگ ءُ آ چریکانی ٹولی ءِ سروکی ءَ کنگءَ بوتگ کہ اود ءَ کسان سالیں بچکاں کار گرگ ءَ بوتگ۔ اے ٹولی ءَ ھواریں آدگہ مردم اے کار ءَ یل بہ کن اَنت اگاں نا گڑا مئے نشانگ ءَ بنت۔
آئی گوشتگ کہ نوید سمالانی مچ شھر ءَ گساں بیڑ برگ، جنین ءُ پیریں مردمانی دلسْیاہ ءُ ورنایانی زوربیگواہ کنگ ءَ تچک ءَ پاکستانی پوج ءِ کمکار بوتگ۔ مچ شھدگ ءَ دگ بندی کنگ ءُ پہ پاکستانی پوج ءَ گاڑیانی زر گرگ ءَ ھم گوں بوتگ۔
جارکش ءَ گوشتگ کہ بی ایل اے ءِ سرمچاراں یک دگہ کاروائی یے ءَ پرندوشی شال ءَ برما ھوٹل ءِ نزیک ءَ پاکستانی پوجءِ چیریں ادارہ (ایم آئی) ءِ کارمند امیر داس ء پیار ءَ نشانگ کرتگ ءُ کشتگ۔ کشگ بوتگیں کارمند ءَ وتی دروشم مٹ کرتگ ءُ پہ پاکستانی پوج ءُ چیریں ادارھانی کارمنداں چاریگی کنگ ءَ بوتگ۔
جارکش ءَ گوشتگ کہ بی ایل اے ءِ سرمچاراں یک دگہ کاروائی یے ءَ گلام ء ابدُاللہ چہ ھوشاپ ءَ دزگیر کرتگ۔ جست ءُ پرس ءِ وھد ءَ گلام ابداللہ ءَ من اِتگ کہ آ پاکستانی پوج ءُ چیریں ادارھانی جوڑ کرتگیں کشندہ ٹولی ءِ کارمندے ءُ اکتر سئید ءِ سروکی ءَ کار کنگ بوتگ۔
آئی گوشتگ کہ گلام ابداللہ ءَ اے ھم من اِتگ کہ آ بالگتر، کولواہ ءُ ھوشاپ ءَ زورگریں پاکستانی پوج ءِ زوراکیاں کمکار بوتگ۔ آئی گوشتگ کہ آ سئید لاٹو، اکتر ءُ آئی زھگانی ھواری ءَ بالگتر ءَ سرمچارانی سر ءَ اُرش ءَ گوں بوتگ۔ اود ءَ میڑ ءَ یک سرمچارے ھم شھید بوتگ اَت ءُ کولواہ ءِ ھند جیرک ءَ راہ بستگ ءُ دو پرپٹ سواریں مردم نشانگ کرتگ۔
جارکش ءَ گوشتگ کہ آ اکتر سئید ءِ ھواری ءَ بالگتر ءَ شتگ ءُ اود ءَ گھرام اُرش ءَ نشانگ کرتگ۔ رند ءَ اود ءَ پاکستانی پوج ءُ چیریں ادارھانی کارمند ھم اتکگ اَنت۔ دژمن ءِ چریک ءَ اے ھم من اِتگ کہ ھوشاپ ءِ بازار ءُ کش ءُ پھناتاں اکتر سئید ءِ سروکی ءَ جوڑ کرتگیں کشندہ ٹولی ءِ کارمنداں چہ چیریں ادارہ (ایم آئی) ءِ نیمگ ءَ 35 مردم ءِ نشانگ کنگ ءِ لڑ دیگ بوتگ ءُ آیاں پہ نشانگ کنگ ءَ وتاس ھم دیگ بوتگ
جیھند بلوچ ءَ گوشتگ کہ گلام ابداُللہ ءَ راجی میاربار ءِ سر زد بوگ ءَ بلوچ راجی آمیدگس ءَ مرگ ءِ سزا داتگ ءُ سرمچاراں کشتگ۔
