شال: دو ماہ پیش چہ ھزدار ءَ زور بیگواہ کنگ بیتگیں این ڈی پی ءِ سروک گنی بلوچ ءَ یل نہ کنگ ءِ بگیریءَ کھول ءِ نیمگ ءَ زھرشانی روانکے کشگ بیتگ۔ روانک ءَ وی بی ایم پی، این ڈی پی ءِ کارکن زوربیگواھیں مردمانی کھولاں بھر زرتگ۔
زھرشانی کنوکیں مردماں گنی بلوچ ءِ اکس، پلے کارڈ ءُ بینر دستاں بیتگ اَنت۔ آیاں گنی بلوچ ءَ ھوار پہ زور بیگواھیانی بگیری ءَ اوگام جتگ۔
زور بیگواھیں گنی بلوچ ءِ کھول ءِ گوشگ اِنت کہ گنی بلوچ دو ماہ پیش چہ ھزدار ءَ زور بیگواہ کنگ بیتگ داں انوں آئی بابت ءَ مارا ھچ وڑیں سرپدی دیگ بوگ ءَ نہ اِنت۔ ما مرچی لاچار بیتگیں کہ زھرشانی بہ کن ایں۔
زھرشانی کنوکیں مردماں گوں سرکار ءَ لوٹ کرتگ کہ گنی بلوچ ءَ ھوار درسیں بیگواھیں مردم زوت یل کنگ بہ بنتءُ زوریں بیگواھیانی درچ بند کنگ بہ بیت۔
