بلوچ یکجھتی کمیٹی ( بی وائی سی ) ءَ ماں رسانکدر ءَ وتی شنگ کرتگیں درشانے ءَ گوشتگ که بلوچ راجی مچی ءَ یک سالے سرجم بوگ ءَ اِنت ، اے راجی مچی بس یک سیاسی مچی یے نه بیتگ آ انوں په بلوچاں یک راجی میراسے جوڑ بیتگ۔
آئی ءَ گوشتگ که راجی مچی ءَ بلوچ راج نه تھنا یک ھواریں پجارے ءِ بنیاد ءَ یکجاه کرتگ بلکیں اے مچی ءَ کردی دروشم ءَ هم اے گپ پدر کرتگ که راجی یکجاھی ءُ راجی توان مستریں توانمندی اِنت ، زوراکی ءُ رستری ءِ بنیاد ءَ ریاستی نزام ءِ ھلاس کنگ ھم ایشی بنیاد ءَ بیت. په اے مچی ءَ هزارانی کچ ءَ بلوچ چه دور ءُ گرانیں سپر ءِ گوازینگ ءَ پد تلار ءُ گوادر ءَ سر بیتگ اَنت ءُ راجی یکجاھی ءَ وتی کرد پیلو کرتگ ، اے وھد مئے راجی یکجاھی ، سیاسی زانشت ءُ گھگیری توکل ءِ مستریں چیدگ بیتگ اَنت۔
بی وائی سی ءَ گوشتگ که راجی مچی گوں شھیدانی ھون ءَ رژن بیتگ که آیانی دیمونی ءَ هزارانی کچ ءَ بلوچ ھمے توکل ءِ سر ءَ تپاک کرتگ اَنت کہ آ ھمک توانمند په راجی تپاکی ءُ ھستمان ءَ تاوان اَنت پروش دات کن اَنت ، اے مچی ءَ چاگردی بھر ءُ بانگ رد کرتگ اَنت ءُ راجی زانشت ھمک گس ءُ گدان ءَ سر کرتگ ءُ ھمے لیکھ دیم ءَ آرتگ که تھنا راجی تپاکی اِنت راجی ھستمان ءُ پجار ءِ مانزمان اِنت ، په اے زانشت ءُ گھگیری لیکھ ءِ گیش کنگ ءَ بلوچ یکجھتی کمیٹی راجی مچی ءِ یک سال سرجم بوگ ءِ روچ ءَ جتائیں زانشتی ، سیاسی ءُ راجی پروگرام برجاه دار ایت۔
آئی ءَ گوشتگ که اے پروگراماں بلوچ راجی یکجاھی ، انوگیں سیاسی جاور ءُ گھگیری گوستانک ءِ بنیاد ءَ زانشتی ءُ سیاسی ویبینار برجاه دارگ بیت ، ھمے وڑ ءَ بلوچستان ءَ بلوچ راجی مچی ، راجی تپاکی ءُ گھگیری لیکھ ءِ نام ءَ زانشتی دیوان برجاه دارگ بیت ، چه ایشی ءَ ابید بلوچستان ءَ په زانشتی پادآهگ ءَ پنتاک بھر کنگ ، شھیدانی مانشانی سر ءَ چادر دیگ ءُ چاگردی رسانکدرں سرپدی دیگ آدگه کار اَنت۔
بی وائی سی ءَ گوشتگ که گل وتی درسیں دمگ ءُ ھنکیناں گوشگ لوٹ ایت که راجی مچی ءِ یک سال سرجم بوگ ءِ درگت ءَ پروگرامانی درچ ءَ زوت بندات به کن اَنت ، ما گوں بلوچ راج ءَ لوٹ کن ایں که وتی ھنداں برجاه دارگ بیتگیں دیواناں بھر بزور اَنت ، شھیدانی مانش ءِ سر ءَ چادر دیگ ءِ مراگش ءُ چاگردی رسانکدراں سرپدی دیگ ءَ کار به کن اَنت۔
