بلوچ یکجھتی کمیٹی ( بی وائی سی ) ءِ سروک ڈاکٹر سیبه بلوچ ءَ وتی شنگ کرتگیں درشانے ءَ گوشتگ که ما مروچی گوں انچیں زمانگے ءَ دچار ایں که زاھر ءَ جمھوریت اِنت بلے راستی ءَ جمھوریت ءِ بس نام پشت کپتگ۔
آئی ءَ گوشتگ که بی وائی سی ءِ سروکاں چار ماه ءَ گیش اِنت که بے میار ءَ سزا دیگ بوگ ءَ اَنت ، منی پت میر بشیر اهمد بس په ھمے سوب ءَ زوربیگواه کنگ بیتگ که من چه سیاست ءَ دزکش به باں۔
ڈاکٹر سبیه بلوچ ءَ گوشتگ که این ڈی پی ءِ کارکن گنی بلوچ ، زکریا بلوچ ءُ زاھد بلوچ ھم زوربیگواه کنگ بیتگ اَنت ، چاگردی کارکن گلزار دوست ءِ درکانودی بندیگی ءَ یک ماھے سرجم بیتگ ، گلگت بلتستان ءِ مردمی ایکشن کمیٹی ءِ سروک ءُ پی ٹی ایم ءِ الی وزیر ءَ هوار بازیم سروک بندیگ اِنت ، مرچی چه گوادر ءَ بلوچ وومن پورم ءِسروک شلی بلوچ ءُ آئی سنگت آدگه جنین ھم دزگیر کنگ بیتگ اَنت۔
آئی ءَ گوشتگ که زوربیگواهی ، درکانودی کوش ، آمیدگسی نزام ، بے تواریں رسانکدر ، سول سوسائٹی ، بے تواریں گرانھادی ، کِشت ءُ کشار ءِ سر ءَ ٹوھیں ٹیکس ، باج گیری ، ءُ مادنانی لٹ ءُ پل ، په لس مھلوک ءِ زندگ بوگ ءَ دگه کجام راه پشت کپتگ ، ھما کہ اے جاوراں شر لیک اَنت آ اے بے جاریں بند آرگ ءِ بھر اَنت۔ اے پوجی نزام بس گوں توپک ءِ زور ءَ برجاه نه اِنت بلکیں گوں ھما کلم ءَ ھم برجاه اِنت آ بھا بیتگ ، ھما رسانکدری کارکن ءَ که چه ترس ءَ بے توار اِنت ، ھما چاگردی کارکن ھم ھوار که آ گوں مردماں نه اِنت ءُ ھما سیاست دان ھم ھوار اِنت که آئی ءَ په وتی زاتی نپاں وتی راج ءِ مرچی ءُ باندات بھا کرتگ۔
ڈاکٹر سبیه بلوچ ءَ درشان ءِ گڈی ءَ بی وائی سی ءِ سروکاں ھوار ڈاکٹر شلی بلوچ ءُ آدگه بندیگیں جنینانی یل کنگ ءِ لوٹ کرتگ ءُ گوشتگ که این ڈی پی ءِ بیگواھیں کارکن ، منی پت بشیر اھمد ءُ درسیں زوربیگواھیں مردم یل کنگ به بنت ، اگاں مرچی ما بے توار به به ایں گڑا باندا ھچ وڑیں توار پھریز نہ بیت۔
