بلوچ لبریشن آرمی (بی ایل اے) ءِ جارکش جیھند بلوچ ءَ گوشتگ کہ بی ایل اے ءِ سرمچاراں کلات ءَ پاکستانی پوج یک اُرشے ءَ نشانگ کرتگ ءُ باز تاوان داتگ۔ میڑ ءَ سنگت سھیب بلوچ پنام امیر بکش شھید بوتگ۔
آئی گوشتگ کہ مرچی کلات ءِ ھند کوھک ءَ زورگریں پاکستانی پوج ءَ سھب ءِ ادار نھ ءِ نزیک ءَ پہ زوراکی ءَ تر ءُ گرد ءِ جھد کرتگ کہ سرمچاراں سنگر گپتگ ءُ اُرش کرتگ۔ اے اُرش داں چل دمان ءَ برجاہ بوتگ۔ ایشی ءَ زورگریں پاکستانی پوج ءِ نھ کارمند مرتگ ءُ باز گوں ٹپی ایں جاوراں تتکگ۔
آئی گوشتگ کہ زورگریں پاکستانی پوج گوستگیں پنچ روچ اِنت کہ کوھک ءُ کش ءُ پھناتاں لشکر کشی کنگ ءَ اِنت، بلے بی ایل اے ءِ سرمچاراں گوں مھکمیں شوربندیاں پاکستانی پوج یکشل ءَ ٹوھیں تاوان داتگ۔ ھمے میڑ ءَ سنگت سھیب بلوچ پنام امیر بکش شھید بوتگ۔
جارکش ءَ گوشتگ کہ شھید سنگت سھیب بلوچ پنام امیر بکش ء مھمد دین ءِ بنیاد ءَ کلات ءِ ھند منگچر ءِ جاہ منند اِنت ءُ انوں آ شال ءِ ھند کلی اسمائیل ءَ نشتگ۔ آ یک سالے ءَ پیش بی ایل اے ءَ ھوار بوتگ ءُ پہ راجی آجوئی ءَ کلات ءِ سنگر اں وتی کرد ءَ پیلو کنگ ءَ بوتگ۔
آئی گوشتگ کہ شھید سھیب بلوچ یک دلیر، تمردین ءُ زمہ واریں سنگتے اَت۔ آئی وتی آشوبی زند ءِ کمیں وھد ءَ بازیں ٹوھیں کاروائیاں بھر زرتگ۔ آ نہ تھنا یک دلیریں سپاھی یے بلکیں یک زانتکاریں آشوبی کارکنے بوتگ۔ آئی سْیادی گوں زرمبشت ءِ پگر ءَ ھمگرنچ بوتگ۔
جارکش ءَ گوشتگ کہ آ گڈی ءَ ھم دیم ءَ بوتگ ءُ زورگریں پوج ءِ دیم پہ دیمی کرتگ ءُ دژمن سک ءَ تاوان داتگ۔ آئی دلیری ءُ دیمونی نہ تھنا کلات ءِ سنگراں بوتگ بلکیں پہ سرجمیں راجی زرمبشت ءَ یک رژنائیں مسالے۔
جیھند بلوچ ءَ گوشتگ کہ شھید سھیب ءِ دیمونی پہ بلوچ راجی گوستانک ءَ یک نوکیں درے کہ پشت ماں پشت ءَ آجوئی لوٹوکاں جھد ءِ توکل، راہ ءُ دلجمی دیان کنت۔
