اسلام آباد ءَ بلوچ یکجھتی کمیٹی ءِ برجاھیں زھرشانی نندانک ءِ سروک ڈاکٹر ماہ رنگ ءَ ماں چاگردی رسانکدر ایکس ءَ نبشتگ کہ پی ٹی ایم ءِ سروک منزور پشتین گوستگیں چنچو ھپتگ اِنت کہ درکانودی بندیگ اِنت اسل ءَ اے نزوریں راجانی توار ءِ بند کنگ ءِ منانک اِنت۔ ھمے بنیاد ءَ منزور ءِ سر ءَ دروگیں ایپ آئی آر نیستگ آ چہ بنیاد ءَ نزور ھلاس اِنت۔ منزور چمن ءَ پرایمنیں زھرشانی ءَ ھوار بوتگ ءُ تربت ءَ روگ ءِ جار ئے جتگ ھمے بنیاد ءَ منزور ءِ سر ءَ دروگیں ایپ آئی آر نبیسگ ءُ دزگیر کنگ بوتگ۔
آئی ءَ گوشتگ کہ اے سوڑگ ءَ ریاست بہ کنت کہ مارا کج ءَ روگی اِنت ءُ کج ءَ روگی نہ اِنت؟ چے گپ کنگی اِنت ءُ چے کنگی نہ اِنت؟
ڈاکٹر ماہ رنگ ءَ گوشتگ کہ اے درسیں ھیلہ ءُ زوراکیاں ابید پشتون سیاسی ءُ مردمی ھکانی کارکناں کانود ءِ پارست ءَ منزور ءِ کیس مڑ اِتگ ءُ تئی ھم آمیدگس ءَ منزور ءِ درسیں کیس ھلاس کرتگ اَنت ءُ پہ شرپ یل داتگ بلے شما وتی آمیدگس ءُ راھبند لپاشتگ اَنت منزور ابید کیس ءُ ایپ آئی آر ءَ زور بیگواہ کرتگ ءُ رند ءَ آ پنجاپ ءِ زندان ءَ درکانودی بندیگ کرتگ۔
آئی ءَ گوشتگ کہ اے ریاست ھما وڑ ءَ بلوچ ءُ پشتونانی سر ءَ زور کارمز کنگ ءُ مئے پرایمنیں جھدانی ھلاس کنگ ءِ جھد ءَ کنگ ءَ اِنت آؤکیں روچاں ایشی آسر ریاست ءِ گمان ءَ چہ باز ھما دیم بیت۔ ما ریاست مدام گوں تچکی ءَ گوشتگ کہ ما زور ءُ زوراکیانی کارمز کنگ ءَ ھچ وڑ ءَ بے توار نہ بہ این ءُ نیکہ چہ زور کارمز کنگ ءَ پدکنز بیوکیں مردمان ایں۔
ڈاکٹر ماہ رنگ ءَ گوشتگ کہ تو چنچو زور کارمز کن ئے ما جھد ءَ ھمچو ترند کن این ءُ اے جھد ءَ گوں ترندی ءَ دیم ءَ بر ایں۔
آئی ءَ گوشتگ کہ من گوں شما درساں ھمے لوٹ ءَ کناں کہ پہ مزور پشتین ءِ آجوئی ءَ توار چست بہ کن اِت ءُ پہ آئی چہ زندان ءَ آجو کناھینگ ءَ وتی کرد ءَ پیلو بہ کن اِت۔
