بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں مستونگ ، کلات ، زامران ، بلیده ءُ شال ءِ اُرشاں زورگریں پاکستانی پوج ءِ میجر زیاد ءَ هوار 23 کارمند کشتگ ، نوشکے ءَ کشنده ٹولی ءِ کارمندے کشتگ ءُ پنجگور ءَ جاسوس کیمره تباه کرتگ اَنت ، دالبندین ءُ نوشکے ءَ مادن بروکیں گاڑی مانداشتگ ءُ تباه کرتگ اَنت۔
آئی ءَ گوشتگ که بی ایل اے ءِ سرمچاراں گوستگیں روچ ءَ مستونگ ءِ تلک کاوی ءَ زورگریں پاکستانی پوج ءِ کارمند گوں چیر کرتگیں شورھاں نشانگ کرتگ اَنت ، اُرش ءَ پد زورگریں پاکستانی پوج ءِ دیم ءَ آھوکیں کاروان سنگر گپتگ ءُ نشانگ کرتگ که اے اُرشاں زورگریں پاکستانی پوج ءِ میجر زیاد ءَ ھوار شش کارمند جاھی مرتگ ءُ سے ٹپی بیتگ۔
جارکش ءَ گوشتگ که سرمچاراں مستونگ ءِ ھند آب گل ءَ زورگریں پوج ءِ پیادگیں کارمند گوں چیرکرتگیں شورھاں نشانگ کرتگ اَنت که ایشی آسر ءَ پوج ءِ دو کارمند مرتگ ءُ چار ٹپی بیتگ۔
آئی ءَ گوشتگ که بی ایل اے ءِ سرمچاراں کلات ءِ ھند کوھک ءَ زورگریں پاکستانی پوج ھما وھد ءَ سکا تاوان ءِ داتگ که آ په زوراکی ءِ نیت ءَ دیم ءَ آھگ ءِ جھد ءَ کنگ ءَ بیتگ ، سرمچاراں زورگریں پوج ءِ کاروان ءِ سر ءَ سنگر گپتگ ءُ نشانگ کرتگ ، زورگریں پاکستانی پوج ءِ سے گاڑی تچک ءَ اُرش ءِ زد ءَ اتکگ ، پروش وارتگیں لگوریں پوج ءِ کارمنداں تچگ ءِ جھد کرتگ که سرمچاراں انگر ءَ کرتگ ءُ نشانگ کرتگ اَنت ، اُرش ءَ زورگریں پوج ءِ 13 کارمند جاھی مرتگ ءُ ھمے وڑ ءَ کارمندانی سلاه ھم سرمچاراں گپتگ اَنت۔
جارکش ءَ گوشتگ که په زورگریں پوج ءِ کمک ءَ آھوکیں کاروان ھم سرمچارانی یک ٹولی یے ءَ ترندیں اُرشے ءِ نشانگ کرتگ که دژمنیں پوج ءَ گیشتر جانی ءُ مالی تاوان بیتگ که ایشی آسر ءَ زورگریں پوج پدکنز بوگ ءَ لاچار بیتگ۔
آئی ءَ گوشتگ که بی ایل اے ءِ سرمچاراں نوشکے ءَ زورگریں پاکستانی پوج ءُ چیریں ادارھانی جوڑ کرتگیں کشنده ٹولی ءِ نزیکیں کارمند مھاویه جمالدینی گوستگیں شپ ءَ ھما وھد ءَ اُرشے ءَ نشانگ کرتگ ءُ کشتگ که آ گوں وتی گاڑی ءَ کلی جمالدینی ءَ وتی گس ءَ روگ ءَ بیتگ۔
جارکش ءَ گوشتگ که زورگریں پاکستانی پوج ءِ چریک مھاویه جمالدینی نوشکے ءَ سلاه بندیں ٹولی ءِ سروکے ءَ کنگ ءَ بیتگ که مردمانی نشانگ کنگ ، زورگریں پوج ءِ ھمرائی ءَ گسانی چادر ءُ چار دیوالی ءِ پادمال کنگ ءُ ورناھانی زوربیگواھی ءُ بلوچ شھیدانی کھول ءِ ترسینگ ءَ ھوار بیتگ ، آئی ءَ جنینانی بلیک میل کنگ ءِ ھوار زورگریں پوج ءِ سروکیءَ زمینانی زورگری ءُ باج گرگ ءَ هوار بیتگ۔
آئی ءَ گوشتگ که بی ایل اے ءِ انٹلی جنس ونگ زرآب ءَ چریک مھاویه جمالدینی ءِ تر ءُ گرد ءِ سر ءَ چم سک داتگ اَنت ، مھاویه جمالدینی راجدروھی ءُ بلوچ راج ءِ سر ءَ زوراکیانی ھوار بوگ ءِ سوب ءَ تیرگواری کرتگ ءُ کشتگ ، اے ٹولی ءِ آدگه مردماں ھم زراب چارگ اِنت که آ ھم مھاویه جمالدینی ءِ پیم ءَ گڈی آسر ءَ سر کنگ بنت۔
جارکش ءَ گوشتگ که بی ایل اے ءِ سرمچاراں نوشکے ءِ ھند زیارت ، دستیگر دوراھی ءُ دالبندین ءَ کرود پاٹک ءَ مادن بروکیں دو گاڑی مانداشتگ ءُ تباه کرتگ ، ھمے میان ءَ سرمچاراں دالبندین ءَ مزنیں شھدگ بند کرتگ ءُ گاڑی پٹ ءُ پول کرتگ اَنت۔
آئی ءَ گوشتگ که بی ایل اے ءِ سرمچاراں 22 جولائی ءَ زامران ءِ ھند آرچنان ءَ زورگریں پاکستانی پوج ءِ کارمند گوں چیرکرتگیں شورھاں نشانگ کرتگ اَنت که اُرش ءَ زورگریں پوج ءِ یک کارمندے جاھی مرتگ۔
جارکش ءَ گوشتگ که مرچی بی ایل اے ءِ سرمچاراں بلیده ءِ ھند گلی ءَ زورگریں پاکستانی پوج ءِ کاروان ءَ ھواریں گاڑی یے گوں چیرکرتگیں شورھاں نشانگ کرتگ ، تراک ءِ آسر ءَ زورگریں پوج ءِ دو کارمند مرتگ ءُ سے ٹپی بیتگ ھمے وڑ ءَ گاڑی سرجم ءَ تباه بیتگ۔
آئی ءَ گوشتگ کہ دوشی بی ایل اے ءِ سرمچاراں شال ، اکتر آباد ءَ زورگریں پاکستانی پوج ءِ چوکی ءِ سر ءَ دستی بمب اُرش کرتگ که اُرش ءِ آسر ءَ پوج ءَ تاوان بیتگ۔
جارکش ءَ گوشتگ که سرمچاراں پنجگور ءِ ھند پل آباد ءَ زورگریں پوج ءِ جتگیں جاسوس کیمره ، ٹاور ءُ آئی ءِ گون ءَ بندوکیں سامان نشانگ کرتگ ءُ تباه کرتگ اَنت۔
جیھند بلوچ ءَ درشان ءِ گڈی ءَ اے درسیں اُرشانی زمه واری من اتگ ءُ دژمن ءِ سر ءَ ٹوھیں اُرشانی درچ ءِ برجاه دارگ ءِ کول ءَ کن ایں۔
