بلوچستان ءَ پاکستان ریاست ءِ زوراکیانی بگیری ءَ بلوچ نیشنل موومنٹ ( بی این ایم )ءَ نیدر لینڈ ءِ شھر دی ھیگ ءَ پاکستان ءِ سپارتجاہ ءِ دیم ءَ زھرشانی کرتگ۔ زھرشانی ءَ بی این ایم ءِ باسکاں بازیں کچے ءَ بھر زرتگ۔
زھرشانی کنوکیں مردماں زور بیگواھیں مردمانی اکس ءُ پلےکار گوں بیتگ اَنت ءُ آیاں بلوچستان ءَ پاکستانی پوج ءِ زوراکیانی بگیری ءَ اوگام جتگ۔
آیاں تران کرتگ ءُ گوشتگ کہ پاکستانی پوج بلوچستان ءَ ھمک روچ زوراکی کنگ ءُ بلوچ پسگاں آوار جنگ ءُ بیگواہ کنگ اِنت۔ بیگواھیں مردمانی تہ ءَ بلوچ ءِ جنک ھم گون اَنت۔ انچوش کہ ماہ جبین بلوچ اِنت چہ شال ءَ بیگواہ کنگ بیتگ انگت ءَ آئی ھچ وڑیں ھال نیست۔
آیاں گوشتگ کہ بلوچستان ءَ زوریں بیگواھیانی بگیری ءَ توار چست کنگ ءِ پژدر ءَ بلوچ یکجھتی کمیٹی ءِ سروک ھم دزگیر کنگ ءُ زندانی کنگ بیتگ اَنت۔ چہ تھری ایم پی او ءِ رد ءَ آیاں سے ما ہ سرجم بیتگ بلے انگتءَ درکانودی پہ ریمانڈ ءَ پولیس ءِ دستءَدیگ بیتگ اَنت۔
زھرشانی کنوکیں مردماں گوں میان استانی تک ءَ لوٹ کرتگ کہ آ بلوچستان ءَ پاکستان ءِ زوراکیانی بگیری ءَ گامگیج بزور اَنت ءُ آئیءَ بلوچانی گون ءَ بیوکیں زوراکیانی بابت ءَ جست بہ کن اَنت۔
