شال: په زوربیگواھیں مردمانی پد جنگ ءَ وائس پار مسنگ پرسنز ( وی بی ایم پی ) ءِ برجاھیں زھرشانی گدان ءَ 5883 روچ سرجم بیتگ ، بی ایس او ءِ پیشیگیں سرکماش مھیم ھان بلوچ ءَ جتائیں بھرگاں سیادی داروکیں مردم گدان ءَ اتکگ ءُ ساڑی بیتگ اَنت.
مھیم ھان بلوچ ءَ بلوچستان ءَ زوریں بیگواھیانی درچ ءِ ترندی ، زوربیگواھیں مردمانی درکانودی کوش ءُ بیگواھیں مردمانی یل نه کنگ سر ءَ بژن درشان کرتگ ءُ گوشتگ که بلوچستان ءَ زور ءِ کارمرز کنگ ءُ درکانودی کارانی سوب ءَ بلوچستان ءَ پد منتگی گیش ءُ جاور ناگیگ بیتگ اَنت.
آئی ءَ گوں سرکار ءَ لوٹ کرتگ که آ بلوچستان ءَ زور ءِ کارمرز کنگ ءُ درکانودی کاراں پھریز به کنت ، بلوچستان ءِ جیڑھ سیاسی اِنت ایشی ءَ چه سیاست ءِ راه ءَ گیش ءُ گیوار به کنت ، زوربیگواھیں مردمانی یل کنگ ءِ بابت ءَ دلجمی به دنت ءُ زوریں بیگواھی ءُ زوربیگواھیں مردمانی درکانودی کوش ءِ درچ ءَ بند به کنت.
