بلوچ یکجھتی کمیٹی ءَ وتی شنگ کرتگیں درشان ءَ بژن درشان کرتگ ءُ گوشتگ کہ راستی ھمیش اِنت کہ بی وائی سی ءِ سروکانی بگیری ءَ برجاهیں آمیدگسی کاروائی بُنکی کانودی رھبندانی ءُ انسانی ھکانی بگیری اِنت ، چار ماه اِنت که مئے سنگت درکانودی بندیگ اَنت ، آ اَبید ءِ تچکیں کانودی منانک داں سے ماه ءَ 3 ایم پی او ءِ رد ءَ بندیگ بیتگ اَنت ءُ چه ایشی ءَ پد بے موکل ءَ داں دگه ده روچ ءَ دارگ بیتگ اَنت۔
آئی ءَ گوشتگ که ایشی ءَ پد گوں کوھن ءُ نزوریں ایپ آئی آر ءِ بنیاد ءَ یکبرے پد ءَ تھانه ءَ برگ بیتگ اَنت ، بندیگی ءِ وھد ءَ آیاں ناں کھول یا وکیل ءِ گندگ ءِ موکل دیگ نه یتگ ناں وکیل نامگ ءِ دز رند کنگ کنگ ءِ موکل دیگ بیتگ ، اے کانود ءُ رھبندانی بگیری اِنت ، چه آمیدگس ءِ پرمان ءَ ابید هم پولیس ءُ چیریں ادارھانی کارمنداں په زانت آیانی کانودی ھک پل اتگ اَنت۔
بی وائی سی ءَ گوشتگ که مرچی آیانی ده روچی ریمانڈ سرجم بیتگ ءُ آ چه آمیدگس ءِ ھما پشت ءِ دروازگ ءَ چیروکائی آرگ بیتگ اَنت که اے دروازگ بس په کازیاں کارمرز بیت ، اے کار ءِ مول ھمیش اِنت که وکیل چه آمیدگس ءِ آھگ ءَ دارگ به بنت ، بلے چه وکیل ءُ سنگتانی گھگیری ءَ وکیل آمیدگس ءَ سر بیتگ اَنت۔
آئی ءَ گوشتگ که بژنی گپ ایش اِنت که آمیدگس ءَ ناں دھیں روچانی جست ءُ پرس ءِ رپورٹ پیش کرتگ ناں دگه دیمروی یے پدر کرتگ ، چه ایشی ءَ ابید سرکاری وکیلاں آمیدگس ءَ ساڑی ئیں کازی مھمد امین مبین ءِ گون ءَ په زبانی گپے ءَ دگه گیشیں پانزده روچ ریمانڈ ءِ لوٹ کرتگ که کازی ءَ ابید مئے وکیلانی گپانی اِشکنگ ءَ سرکاری وکیلانی لوٹ من اِتگ۔
بی وائی سی ءَ گوشتگ کا اے کار نه تھنا کانود ءُ رھبندانی بگیری اِنت بلکیں اے گپ ءَ هم پدر کنت که کازی چیریں ادارھانی رد ءَ سرکار ءِ ھمدستی ءِ بنیاد ءَ پیسله کنگ اِنت ، آمیدگس که بائد اِنت انساپ ءِ چیدگ به بیت نوں وت سیاسی زوراکی ءِ ھمدست جوڑ بیتگ۔
بی وائی سی ءَ درشان ءِ گڈی ءَ لوٹ کرتگ که په اے کیس ءَ یک جتا ءُ وتواکیں کازی یے گچین کنگ به بیت دانکه مئے سنگت چه وتی کانودی ءُ رھبندی ھکاں زبھر مه بنت ءُ مردمانی بروسه چه آمیدگس ءَ مہ پرش ایت۔
