سند: 17 جنوری 2024 ءَ سندی رھشون سائیں جی ایم سید ءِ 120 سالروچ ءِ درگت ءَ سندھودیش روولیوشنری آرمی ءِ چیپ کماندار ازگر شاہ ءَ وتی کلوھے شنگ کرتگ ءُ گوشتگ کہ پاکستان ءِ پنجاپی ریاست ءَ ھپتاد ءُ پنچ سال اِنت کہ سند ءِ درسیں مڈی تیل ، گیس ، اشکر ، کارونجھر، کھیرتھر ، بھگوٹوڑھو کوہ ءِ سنگ ، گرینائیٹ، ماربل، دریا ءُ ڈگار دستیگ کرتگ اَنت، سندی راج بزگ ءُ تنگدست کرتگ۔ پہ زانت ءُ سما شوربندی ءِ بنیاد ءَ بھریا ٹاؤن، ڈی ایچ اے، زولپکار آباد، کمانڈرسٹی ھوار بازیں جاگھ بستگ ءُ دری مردماں آرگ ءُ سند ءِ ھندوانی اد ءَ دلسیاہ کنگ ءُ کشگ، سند ءِ مردماں گوں کمیناں بھر کنگ ءَ اِنت۔
آئی ءَ گوشتگ کہ یک نیمگے ءَ ” کارپوریٹ پارمنگ “ ءِ نام ءَ سند ءِ 13 لک ڈگار پاکستانی لشکر ءَ دستیگ کرتگ ءُ سندیانی گون ءَ زوراکی کنگ ءُ سندیاں چہ ڈگار ءَ کشگ ءَ اَنت۔ دومی نیمگ ءَ پاکستانی لشکر، رینجر ءُ چیریں ادارہ ماڑی جلبانی ءَ ھوار آدگہ چنچو میتگاں بیڑ برگ ءُ سندی دھکانکاراں کشگ ءَ اَنت۔ سیمی نیمگ ءَ وتگڑیں دو راجی لیکہ ءُ پئن اسلام ازم ءِ بنیاد ءَ لشکر تیبہ، جماھت الدواہ، جیش مھمد، جیش الادل، سپاہ سھابہ، اللہ اکبر زرمبشت ءُ آدگہ مزھبی ناشرکاراں سند ءَ مھکم کنگ ءُ سند ءِ کوھنیں مزھب، انسان دوست، راجدوستی ءِ تب ءَ ھلاس کنگ ءُ جنگ ءُ ناشری ودی کنگ ءَ اِنت۔
ازگرشاہ ءَ گوشتگ کہ پاکستان ءِ وتگڑیں گچینکاری چوناھیا پاکستانی لشکری اسٹیبلشمنٹ ءِ جوڑ کرتگیں کسمانکے، ایشی بھر زوروک ھمے کسمانک ءِ ازمکار اَنت۔ پاکستان ءِ گچینکاری سندی راج ءِ ھستمان ءَ پہ پنجاپ ءِ ایردستی ءِ مھکم کنگ ءَ یک پندلے۔ پمیشکا سندی راج ءَ پاکستانی ریاست ءُ آئی چونیں ھم وتگڑیں گچینکاری ءِ پندل ءَ وت ءَ دور دارگ لوٹ ایت۔ چی ءَ کہ پاکستان ریاست دلار ءُ ناشریں زورگری ءِ پشت کپتگیں ٹکراں پی پی ءُ آدگہ ٹولیانی وڑ ءَ برجاہ دارگ لوٹ ایت ءُ پہ اے ناشریں نپان ءُ کرسی ءِ نیمون ءَ بے زرد ءُ دلاراں کار گرگ ءَ اِنت۔ پاکستان ءُ چین ءِ ھواری ءَ سی پیک شوربندی ءِ پارست ءَ سند ءِ درسیں تیاب ءُ ھشکاوک، روگ ءُ آھگ ءِ راھاں دستیگ کنگ ءُ سندیانی زندمان ءِ درسیں راھاں بند کنگ لوٹگ ءَ اِنت۔
آئی ءَ گوشتگ کہ سند ءِ واھنداں! راجی ایرستی ءِ جنجالانی ءُ ترس ءِ جاورانی درگت ءَ سند ءِ رھشون سائیں جی ایم سید ءَ نوکیں راجدوستی ءِ بنیاد نہ تیوک ءَ وتی نبشتانک ءُ گوشتانکانی رد ءَ مارا لیکھی ءُ سیاسی بنیاد ءَ لیکہ ءُ منزل ءِ بارو ءَ سرپد ءُ کڈن کرتگ، بلکیں آئی چہ ایشاں دور بیگ ءِ شوربندی ھم گیشینتگ اَنت۔
ازگر شاہ ءَ گوں سند ءِ ورنایاں دلگوش گور کرتگ ءُ گوشتگ کہ مئے گل سندھودیش روولیوشنری آرمی (ایس آر اے) ءَ پیش ھم رھشون سائیں جی ایم سید ءِ گوشتگیں راہ گچین کرتگ ءُ انگت ءَ سائیں جی ایم سید ءِ سالروچ ءِ درگت ءَ شمارا سید ءِ راجدوستی ءِ لیکہ ءُ پہ گھگیری ءَ ایس آر اے ءِ کاروان ءَ ھوار بوگ ءِ لوٹ ءَ کنت، پمیشکا اے راہ سرڈگار ءِ آجوئی ءُ پھازداری ءِ نیمگ ءَ بارت۔
آئی ءَ گڈی ءَ گوشتگ کہ من سند ءِ گرانگدریں رھشون سائیں جی ایم ءِ 120 ءِ سالروچ ءِ درگت ءَ گوں شرپ ءُ مھر ءَ پل شانی کناب ءُ ھند ءُ سند ءَ ھوار درسیں جھان ءَ سالروچ ءِ مراد باتی دیاں۔
