شال: په زوربیگواھیں مردمانی پد جنگ ءَ وائس پار مسنگ پرسنز ( وی بی ایم پی ) ءِ برجاھیں زھرشانی ءَ گدان ءَ 5882 روچ سرجم بیتگ۔
ھمے میان ءَ وی بی ایم پی ءِ سرکماش نسرالله بلوچ ءَ وتی شنگ کرتگیں درشانے ءَ گوشتگ که ڈاکٹر ماه رنگ بلوچ ، شاه جی سبگت الله ، بیبرگ بلوچ ، گلزادی بلوچ ، گپار بلوچ ءُ امران بلوچ ءِ کھولانی زھرشانی ءَ مرچی دو روچ اِنت که په وتی آزیزانی آجوئی ءَ اسلام آباد ءِ نیشنل پریس کلب ءِ دیم ءَ برجاه اِنت۔
نسرالله بلوچ ءَ گوشتگ که نیشنل پریس کلب ءِ دیم ءَ برجاھیں زھرشانی ءَ نشتگیں جنینانی گونءَ چه انتزامیه ءِ نیمگ ءَ زوراکی کنگ ایمنیں توار ءُ گوں آجوئی ءَ گپ کنگ ءِ سر ءَ بندش جنگ ءِ نشان اِنت ، ما ایشی ءَ ایر جن اِیں ءُ گوں ریاست ءَ لوٹ کن ایں که آ بلوچ جنینانی زھرشانی ءِ بابت ءَ زوت گامگیج به زور ایت ءُ پہ آیانی لوٹانی منگ ءَ گپ ءُ تران به کنت دانکه ڈاکٹر ماه رنگ ءُ بی وائی سی ءِ آدگه بندیگیں سروک زوت یل کنگ به بنت ، ریاست بائد اِنت که په زوربیگواھیں مردم ءُ زوریں بیگواھیانی جیڑھ ءِ ڈیھ ءِ رھبندانی رد ءَ گیش ءُ گیوار کنگ ءَ وتی کرد ءَ پیلو به کنت۔
