اسلام آباد ءَ بلوچ یکجھتی کمیٹی ءِ ناھک ءَ بندیگیں سروک ءُ زور بیگواھیں مردمانی کھولانی نیمگ ءَ مرچی دو روچ اِنت کہ اسلام آباد پریس کلب ءِ دیم ءَ زھرشانی نندانک برجاہ اِنت۔ زھرشانی نندانک ءَ کسانیں زھگ ءُ پیرزال ھم ھوار اَنت۔
زی سرجمیں روچ ءَ اسلام آباد انتزامیہ ءِ نیمگ ءَ پہ آیانی پاد کنگ ءُ گلینگ ءَ زوراکی برجاہ بیتگ ءُ کھولان ءَ ٹینٹ جنگ نہ اشتگ بلے بیگواھیں مردمانی کھولاں چہ درسیں زوراکیاں ابید وتی زھرشانی نندانک برجاہ داشتگ۔
زھرشانی ءَ نشتگیں کھولانی گوشگ اِنت کہ بی وائی سی ءِ سروک ڈاکٹر ماہ رنگ بلوچ، گلزادی بلوچ، بیبو بلوچ، بیبرگ بلوچ، سبگت اللہ شاہ جی، امران بلوچ، بشیر اھمد زھری ءُ گپار بلوچ زوت یل کنگ بہ بنت ءُ بلوچستان ءَ زوریں بیگواھی ءُ سیاسی کارکنانی دزگیری زوت بند کنگ بہ بیت ءُ درسیں بیگواھیں مردم یل کنگ بہ بنت۔
آیاں گوں سرجمیں راج، ھمک بھرگاں سیادی داروکیں مردماں لوٹ کرتگ کہ مئے گون ءَ ھمتوار بہ بنت ءُ مئے زھرشانی ءَ کمک بہ کن اَنت۔ دانکہ مئے لوٹ منگ نہ بیتگ اَنت ما وتی زھرشانی نندانک ءَ اسلام آباد پریس کلب ءِ دیم ءَ برجاہ دار ایں۔
