بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں مرچی کیچ ءِ ھند سامی ءَ سی پیک دگ ءَ زورگریں پاکستانی لشکر ءِ کاروان گوں چیر کرتگیں شورھاں نشانگ کرتگ۔
آئی گوشتگ کہ بی ایل اے ءِ سرمچاراں گشکور، سامی ءِ پنڈوکی کور ءَ سی پیک دگ ءَ دُژمن ءِ چار گاڑیانی کاروان ءِ گاڑی یے گوں چیر کرتگیں شورھاں نشانگ کرتگ۔ تراک ءِ آسر ءَ دو کارمند جاھی مرتگ ءُ کم چہ کم چار کارمند ٹپی بوتگ ءُ گاڑی سرجم ءَ تباہ بوتگ۔
جارکش ءَ گوشتگ کہ بی ایل اے ءِ سرمچاراں 11 جنوری 2024 ءَ دگہ کاروائی یے ءَ بلیدہ ءِ ھند گلی ءَ زورگریں پاکستانی لشکر ءِ راشن بروکیں گاڑی داشتگ ءُ راشن دستیگ کرتگ اَنت۔ لّس مردمی ءِ سوب ءَ ڈرائیور کڈن کرتگ ءُ یل داتگ۔
آئی ءَ گوشتگ کہ بی ایل اے ءَ چہ ایشی پیش ھندی مردم تچکی ءَ گوشتگ اَنت کہ آ پہ دُژمن ءَ سامان سر کنگ ءَ وت ءَ گستا بدار اَنت اگاں نہ وتی جان ءُ مال ءِ تاوان ءِ زمہ وار وت اَنت۔
بی ایل اے ءِ جارکش جیھند ءَ دوئیں اُرشانی زمہ واری منّ اتگ ءُ گوشتگ کہ ھمے کول ءَ کن ایں داں زورگریں لشکر ءِ سرجم ءَ در آھگ ءَ مئے اُرش برجاہ بنت۔
