گوں باسکاں ھیلکاری پتر ءَ تران کنان ءَ ڈاکٹر نسیم بلوچ ءَ گوشتگ کہ راجی زرمبشت تھنا چہ اوگام ءُ جزباتی بوگ ءَ نہ جنز اَنت۔ یک باسما ءُ توانمندیں زرمبشتے ھم بہ بیت کردی بنیاد ءَ سیاست ءِ پڑا کار بہ کنت۔ پمشکا ھژدری اِنت کہ آ زرمبشت سیاسی ءُ سپارتی پڑ ءَ یکشل ءَ دیمروئی بہ کنت۔
آئی ءَ گوشتگ کہ انوگیں جاورانی تہ ءَ سوبمندیں راجی زرمبشت ءِ لوٹ ھمیش اِنت کہ آ یکشل ءَ لیکھی ءُ کارانی تہ ءَ گوزان بہ کنت ءُ وتی سروک ءُ باسکاں جھان ءِ مٹ بیوکیں جاورانی بابت ءَ جاڑیگ بہ کنت۔
بلوچ نیشنل موومنٹ ( بی این ایم ) ءِ وانگی ءُ ھیلکاری ادارہ ( کیپسٹی بلڈنگ ) ءِ رد ءَ جھان ءِ مٹ بیوکیں جاور ءُ بلوچستان ءِ بنگپ ءَ یک آن لائن نیادے برجم دارگ بیتگ۔ اے دیوان ءِ مھمان بی این ایم ءِ چیئرمین ڈاکٹر نسیم بلوچ بیتگ۔ اے دیوان ءِ سروکی جرمنی چیپٹر ءَ کرتگ۔
اے دیوان ءِ مول باسکانی لیکھی، پگری، سیاسی ءُ کردی ھیلکاری ءِ گیشتر مھکم کنگ ءُ میان استمانی ءُ ھندی جاورانی سر ءَ چمشانک دیگ بیتگ۔
ڈاکٹر نسیم بلوچ ءَ ھمے گپ ءِ سر ءَ زور داتگ کہ لیکھی راھبند ءِ سر ءَ پابند بوگ جھد ءِ راستیں توان اِنت۔ وھدے کہ ما وتی بنکی لیکہ ءِ سر ءَ گوں مھکمی ءَ بہ اوشت ایں گڑا جھان پہ مئے توار ءِ گوش دارگ ءُ سرپد بوگ ءَ لاچار بیت۔
آئی ءَ دیمتر ءَ گوشتگ کہ راجی زرمبشت ءَ سنگینی، مھکمی ءُ سابت کدمی سکا درکار اِنت۔ چہ ایشی ءَ ابید ما ھندی ءُ میان استمانی تک ءَ ھچ وڑ ءَ وت ءَ مھکم داشت نہ کن ایں۔
آئی ءَ انوگیں میان استمانی جیڑھانی بابت ءَ گوشتگ کہ اسرائیل ءُ ایران ءِ میان ءَ برجاھیں جنگ بہ بیت یا ھندوستان ءُ پاکستان ءِ جنگ اے داں بلوچ سیمسراں سر بیتگ اَنت۔ پہ اے وڑیں جاوراں سرجم ءَ جاڑیگ بوگ مئے سوبمندی ء مانزمان بیت۔
آئی ءَ اے دوئیں جنگانی میان ءَ امریکہ ءِ کرد ءِ سر ءَ گپ جتگ ءُ گوشتگ کہ امریکہ ءِ کرد تچک اِنت آ گوں میان استمانی نپاں بندوک اِنت، نیکہ پہ دودمانی راھبندانی سر ءَ اِنت۔
آئی ءَ ایران جنگ ءِ میان ءَ پاکستان ءِ کرد ءِ سر ءَ گپ جتگ ءُ گوشتگ کہ انچیں وھداں پاکستان ءِ کرد گندگ بیت کہ آ دمگ ءِ تہ ءَ یک کمکاریں ریاستے ءِ کرد ءَ پیلو کنگ ءَ اِنت۔ اے میان ءَ جھان ءَ دیستگ کہ روکپت ءِ جوڑ کرتگیں ریاست ءِ لشکری سروک امریکہ ءَ پہ وتی ءُ اسرائیل ءِ نپانی پیلو کنگ ءَ کجام وڑ ءَ امریکہ ءَ لوٹائینتگ۔ اود ءَ آئی ءَ ایران ءُ اسرائیل ءِ جنگ ءَ روکپت ءِ ھمدردی ءِ زمہ واری دیگ بیتگ۔
آئی ءَ گوشتگ کہ بلوچ کارکن ءُ سروکاں لوٹ ایت کہ آ میان استمانی ءُ ھندی جاوراں گوں ھورتی ءَ بہ چار اَنت ءُ وتی سیاسی بودناکی ءَ گیش بہ کن اَنت چی ءَ کہ سیاسی بودناکی ھم پیسلہ سازیں بنیادے جوڑ بیت۔
ڈاکٹر نسیم بلوچ ءَ پارٹی ءِ باسکانی کار ساڑاتگ اَنت ءُ گوشتگ کہ بلوچ نیشنل موومنٹ ءِ کارکن جوانیں وڑے ءَ پہ پارٹی ءِ دیمروئی ءَ جوانیں کردے پیلو کنگ ءَ اَنت۔
آئی ءَ درانڈیھ ءَ نشتگیں باسکانی شپ ءُ روچ ءِ جھد ءِ سر ءَ گپ جتگ ءُ گوشتگ کہ انوگیں سالاں بی این ایم ءِ سپارتی کار ءِ تیز بوگ ءِ باز آسر مئے دیم ءَ اتکگ اَنت۔ پد ءَ ھم اے ردیں ھیال مہ بنت کہ گوں یورپی یونین ءِ ادارھاں گند ءُ نند یا چونیں ھم میان استمان پورمے ءَ بلوچ جیڑہ ءِ سر ءَ گپ جنگ سوبمندی انت۔ ما ھما وھد ءَ سوبین بہ ایں کہ میان استمانی ادارہ، یورپی یونین ءُ میان استمانی ادارہ بلوچ راجی جیڑہ ءَ چکچینی بہ لیک اَنت ءُ اے زرمبشت ءَ تچک ءَ سیاسی ءُ انسانی بنیاد ءَ پلہ مرزی ءَ بہ کنت۔
